Presidenti i Shqipërisë Ilir Meta ka dekretuar datën e re të zgjedhjeve vendore, duke publikuar dekretin për mbajtjen e tyre më 13 tetor.
Dekreti për datën e re të zgjedhjeve, erdhi pas një seri takimesh që Kreu i Shtetit zhvilloi gjatë ditës së sotme me drejtues të partive politike, por edhe diplomatë të akredituar në Tiranë.
Gjatë konferencës për mediat, Meta u pyet për qëndrimin e ambasadorëve lidhur me datën e re të zgjedhjeve.
“Qëndrimi im ka qenë dhe është i qartë: në Shqipëri nuk ka zgjedhje në 30 qershor. Ka një pretendim deri tani se nuk është caktuar një datë e re zgjedhjesh. Unë duke dashur të dekurajoj një përshkallëzim, një konflikt më serioz, kam që në 8 e 10 qershor që kam pritur në radhë të parë Kryeministrin për të diskutuar për këtë mundësi që duhet t’u jepnim të gjitha partive të opozitës për të garantuar zgjedhje gjithpërfshirëse.
Sa për ambasadorët, unë i takova, takova edhe zonjën Glover. Kam shumë respekt për integritetin e saj dhe të gjithë ndërkombëtarëve u kam shpjeguar anën kushtetuese dhe ligjore për datën e zgjedhjeve. Unë nuk i kam ndaluar askujt të vëzhgojë proces votimesh, është e drejtë e tyre. Unë thjesht bëj të qartë se ky është raporti ligjor në raport me zgjedhjet e ardhshme vendore që do të jenë në 13 tetor.
Si mund t’i them unë dikujt mos rri ti se mërzitem unë?! Ne shqiptarët jemi mikpritës në radhë të parë.
Së dyti unë vij nga një zonë që dallohet për një mikpritje të theksuar.
Së treti unë mendoj se 30 qershori është ditë e mirë dhe jemi dhe në pikun e sezonit turistik e të mos e e humbasim këtë sezon, pasi jo pak dëme i kanë ardhur ekonomisë sonë dhe shumë familjeve që mbështeten tek turizmi. Secili bën vlerësimin e tij, detyrën e tij. unë bëj detyrën time në emër të Presidentit të Republikës së Shqipërisë për të gjithë qytetarët që dua t’i shoh në paqe”, tha Meta.
