Kryetari i Këshillit të Lartë të Prokurorisë, Gent Ibrahimi, ka deklaruar në mbledhjen e radhës të institucionit, zhvilluar paraditen e së Enjtes, se kandidatët për Strukturën e Posaçme Antikorrupsion (SPAK) do të intervistohen në datat 8-12 Korrik 2019.
Këshilli i Lartë i Prokurorisë është struktura përgjegjëse për verifikimin e kritereve ligjore të kandidatëve për SPAK, si edhe për renditjen e tyre në bazë të pikëzimit.
Por, për të arritur në fazën e pikëzimit, më së pari kandidatët për SPAK duhet të kenë kaluar procesin e Vetingut me vendim të formës së prerë.
Në muajin Prill 2019 u mbyll procesi i aplikimit për Strukturën e Posaçme Antikorrupsion. Deri në përfundim të afatit, aplikuan 24 kandidatë. Pak ditë më parë, nga gara për SPAK u tërhoq prokurori Shkëlzen Cena, i cili vetëm disa orë më vonë u shkarkua nga Vetingu. Gjithashtu, të mërkurën u shkarkua nga Komisioni i Pavarur i Kualifikimit edhe një tjetër kandidat për SPAK, prokurori i Krimeve të Rënda, Eugen Beci.
Aktualisht në garë janë 22 prokurorë. Nga ky total, vetëm dy kanë kaluar Vetingun me vendim të formës së prerë. Ata janë Arben Kraja, prokuror në Prokurorinë e Përgjithshme dhe Dritan Prençi, prokuror tek Krimet e Rënda.
Ndërsa të gjithë të tjerët ose nuk kanë një vendim të formës së prerë ose nuk kanë kaluar ende në Veting.
Gjatë muajit Qershor 2019 janë konfirmuar nga shkalla e parë e Vetingut kandidatët për SPAK: Edvin Kondili, Enkelejda Millonai, Ened Nakuçi, Vladimir Mara, Manjola Kajana dhe Behar Dibra.
Gjithësesi, për këta prokurorë të konfirmuar, ende nuk është zbardhur vendimi i Komisionit të Pavarur të Kualifikimit. Pas publikimit të vendimit të plotë, ekziston mundësia teorike që Komisioneri Publik të ankimojë vendimin e konfirmimit. Pra, praktikisht, kandidatët e konfirmuar nuk kanë ende një vendim të formës së prerë.
Krahas emrave të mësipërm, janë edhe një grup prej rreth 12 kandidatësh të tjerë, të cilët nuk janë përballur ende me trupat e vetingut në seancat dëgjimore.
E gjithë kjo situatë është tregues se prokuroria speciale SPAK kërkon ende shumë kohë për t’u krijuar.
Ndaj, “nxitimi” i Këshillit të Lartë të Prokurorisë për intervistimin dhe pikëzimin e kandidatëve për SPAK duket se është i pavend, të paktën deri sa të përfundojë procesi i Vetingut për të gjithë kandidatët.
Gent Ibrahimi, ka ritheksuar gjithashtu faktin që KLP mund të vendosë ngritjen e SPAK-ut me një numër edhe më të vogël se sa 10 anëtarë, siç përcakton limit ligjor. Kjo zgjidhje është ekstra-ligjore, pasi bie në kundërshtim me vullnetin e shprehur nga ligjvënësi.
Por, zgjidhja e KLP-së nuk përbën përjashtim nga zgjidhjet “ekstra-ligjore” që po aplikojnë një seri institucionesh të reja të krijuara nga Reforma në Drejtësi./Boldnews.al/
