Kryeministri Edi Rama refuzoi dje ftesën e Presidentit Ilir Meta për një takim me të, lidhur me krizën që po kalon vendi.
Por Rama ka zgjedhur të refuzojë takimin, ndërsa ka dhënë si argument agjendën e zënë me fushatën për zgjedhjet, sikundër i quan ai, të 30 qershorit.
“Për shkak të fushatës elektorale që po zhvillohet sipas dekretit presidencial,ku 30 qershori është përcaktuar datë zgjedhjesh,kabineti im ka komunikuar telefonikisht pamundësinë për këtë takim.
Po meqë Ilir Meta vazhdon të luajë letrash, ja dhe me shkrim: Kemi zgjedhje,jam i zënë. E meqë ra llafi tek loja e letrave të Ilir Metës, ju kam thënë pas antidekretit se pas asaj çrmendurie pres edhe nje tjetër. Se ç’kam një ndjesi që do ta bëjë, po për këtë do flasim nga e hëna e më tej se tani kemi vetëm një punë: Zgjedhjet në 30 qershor,” shkruante Rama.
Shkresa e firmosur nga drejtori i kabinetit të Presidentit, Arben Cici, mbante datën 26 qershor dhe i drejtohej drejtores së kabinetit të kryeministrit, Vali Bizhga.
“Dëshiroj t’ju bëj me dije se Presidenti i Republikës, Ilir Meta mirëpret nesër në takim kryeministrin Edi Rama për të biseduar për situatën politike në vend, në çdo orë që ai mundet, duke filluar nga mëngjesi herët në orën 5:00 deri në orën 13:00 në zyrën e tij në Presidencë”.
Por, kryeministri sot është “kapur mat” në një palestër, shumë afër Presidencës. Rreth orës 08:30, Rama është parë të dalë nga një hotel pranë Presidencës, i cili ka edhe pishinë.
Rama ka zgjedhur të bëjë not rreth 60 minuta, në vend që të takohet me Kreun e Shtetit.
Burime të afërta me Ramën bëjnë të ditur se prej disa ditësh kreu i qeverisë ka nisur një seri seancash noti për shkak të problemeve që ka me shpinën, më konkretisht nerving shiatik.
