Ndërsa po shkohet me “këngë në gojë” drejt votimeve të 30 qershorit, institucionet në dukje të pavarura po tentojnë të legjitimojnë procesin që nuk mund të quhet më zgjedhje lokale, por votime si në kohën e diktaturës. Ditën e djeshme ishte Kolegji Zgjedhor i cili në dukje indirekt rrëzoi dekretin e Presidentit për anulimin e zgjedhjeve lokale.
Për avokatin Ledio Braho, duhet parë vendimi i zbardhur, pasi mund të jetë rrëzuar vetëm kërkesa e Partisë së Unitetit Kombëtar dhe jo dekreti presidencial, i cili anuloi zgjedhjet e 30 qershorit. Ai gjykon se çdo vendimmarrje dhe nismë e institucioneve shkon të të njëtën vijë me mendimin e kreut të qeverisë.
“Kjo është në vazhdën e qëndrimeve të kryeministrit Edi Rama. Kur ka dalë me deklarata se dekreti i Presidentit është i pavlefshëm, ashtu ka vendosur edhe KQZ. Në rastin tjetër kur për çështjen “Bbabale” tha se është aktor, edhe prokuroria ka dalë se është aktor. Për çështjen e audiopërgjimeve në gazetën Bild kërkoi që të nisin hetimet për nxjerrje të sekretit hetimor, ashtu bëri edhe prokuroria”-tha Braho, duke dhënë disa argumente se gjithnjë ndiqet linja e qëndrimeve të kryeministrit.
Por ndryshe nga shumë analistë apo ekspertë ligjorë që gjykojnë se vendimi i Kolegjit Zgjedhor ishte njëkohësisht edhe rrëzim i dekretit të Presidentit të Republikës, Braho mendon se duhet zbardhur i gjithë vendimi i arsyetuar, pasi deri më tani kemi vetëm diapozitivi. “Arsyetimi mund të jetë i tillë; rrëzohet kërkesa e Partisë së Unitetit Kombëtar, pasi proces zgjedhor nuk ka”-tha Braho, duke shtuar se vetëm Gjykata Kushtetuese ka tagrin për të interpretuar dhe vendosur mbi dekretet e kreut të shtetit.
Në aspektin moral po pranohet gjerësisht se në 30 qershor zgjedhjet janë të kompromentuara dhe vetëm të tilla nuk mund të quhen, duke u kthyer pas në kohë, në proces votimi me një kandidat. “Gjykata Europiane e të Drejtave të Njeriut ka mbajtur qëndrim për zgjedhjet me një kandidat, pasi nuk ka zgjedhje. Cënohen realisht parimet kushtetuese pasi nuk ka kandidat tjetër, kushdo që shkon të votojë e ka votën lehtësisht të lexueshme”-thotë Braho, i cili ngre pikëpyetjen se këto zgjedhje nuk janë të cenuara fort vetëm në asketin moral dhe funksionimit të demokracisë, por edhe në atë ligjor, duke iu referuar gjykatës ndërkombëtare.
