Presidenti Ilir Meta pritet që pas pak minutash, ora 08:00, të dalë në një konferencë për mediat, një ditë pasi Kolegji Zgjedhor la në fuqi zhvillimin e zgjedhjeve në 30 qershor, ndonëse procesi ishte anulluar nga Kreu i Shtetit me një dekret të posaçëm.
Në njoftimin zyrtar thuhet: “Presidenti i Republikës Sh.T.Z Ilir Meta do japë më 25 qershor 2019, një deklaratë për shtyp në ora 8:00, në ambientet e Institucionit të Kreut të Shtetit”.
Pas vendimit të Kolegjit, Zëdhënësi i Presidencës deklaroi se vendimi nuk ishte tjetër përveçse “skeç”; Tedi Blushi tha: “Asnjë surprizë nga skeçi i radhës i orkestruar prej kohësh.”
Nuk dihet se çfarë qëndrimi do të mbajë Presidenti vetëm pak ditë para 30 qershorit, ku kryeministri Edi Rama dhe partia e tij, vijojnë fushatën dhe shprehen të vendosur për të shkuar drejt një procesi votimesh, në kundërshtim me dekretin e Kreut të Shtetit.
Situata politike në vend dhe ndoshta një apel i fundit i Kreut të Shtetit për të shmangur një përplasje të mundshme civile më 30 qershor pritet të jenë objekt i deklaratës së Presidentit.
