Teksa qytetarët të shumtë e kanë pritur me protesta, në Durrës është zhvilluar takimi elektoral i radhës, ku janë prezantuar kandidatët për kryetar bashki të këtij qarku. Ai që hapi takimin elektoral ishte Vangjush Dako, i vetë cilësuar “akullore” teksa mbrohej nga akuzat për shit-blerje votash, pas daljes së përgjimeve të dosjes 339.
Dako, i cili do të mbahet mend si kryebashkiaku i cili shkatërroi trashëgiminë kulturore me projektin e Velierës, u mburr duke thënë se në qytet po vendoset vepra e një artisti durrsak, që cilin e quajti “ekuivalent me Posedonin”. “Atë që nuk e kanë bërë arkeologët tanë po e bëjmë ne”, tha Dako.
Për blerjen e votave, që pas publikimit të dosjes 339, është vështirë ti klasifikosh vetëm “akuza”, u shpreh: “Na akuzojnë për blerje votash, ju jeni dëshmitar që çdo qytetar ka votuar PS-në nga viti në vit dhe kjo nuk ka ardhur rastësisht, por nga mirësjedhja jonë, nga mos ndarja që u kemi bërë qytetarëve dhe nga puna jonë e përditshme. Por e vërteta është që ata nuk e pranojnë dot që Durrësi nga bastion i PD-së është kthyer në bastion të PS-së. Nuk e pranojnë dot tradhtinë që i kanë bërë demokratëve të këtij qyteti. Jam i sigurt, ne do fitojmë se kemi përkrahjen e popullit, kemi në krye Ramën që nga viti në vit po e mbështet Durrësin, Krujën e Shijakun”.
I dyti që mori fjalën, ishte Artur Roshi, kryetari aktual i bashkisë Krujë, i cili garon nën siglën e PS edhe në këto zgjedhje lokale. Ai bëri premtime për “investime të jashtëzakonshme” në infrastrukturë. Roshi tha se do eliminohet edhe problemi i përmbytjeve.
“Do kemi sigurinë absolute që në Krujë nuk del më ujë”, u shpreh kryebashkiaku, që është akuzuar nga opozita për përfshirje në trafik droge gjatë kohës që ka qeverisur Krujën. “Në 30 qershor, do ketë votim masiv me shumë qetësi popullore”, shprehu bindjen Roshi.
Pas tij, fjalën e mori Elton Arbana, edhe ai si Dako protagonist i dosjes 339. Arbana ishte ai i cili u shfaq më në siklet, aq sa u pa të kullonte djersë.
“PS është familja e madhe politike që ka një simbiozë jetese me gjithë të rinjtë, ku modeli i punës diferencon”. Kështu u shpreh kryetari i PS në Shijak Arbana, ai të cilin Astrit Avdylaj e telefononte dhe me një ton të irrituar dhe i shprehej se Inspektorët e INUK-ut janë duke vënë gjoba tek njerëzit në Sukth dhe se nuk po lidhet dot me Vangjush Dakon (pasi ky i fundit ndodhej në Zvicër me Ramën), për ti kërkuar që ta ndalojnë menjëherë këtë gjë.
Arbana i ankohet dhe i thotë se nuk ka më asnjë autoritet për ta bërë këtë detyrë pasi është shkarkuar nga pozicioni, por Avdylaj e urdhëron që të marrë inspektorët në telefon dhe ta ndalojë menjëherë këtë gjë ose në të kundërt, do të do ta bëjë ai vetë. Në fund të bisedës, Arbana, bindet dhe i thotë të mos shqetësohet sepse do ta zgjidhë menjëherë këtë ‘problem’.
Megjithatë, Rama e falënderoi për “punën e bërë”, ashtu si Vangjush Dakon. “Durrësi do ta kujtojë gjithmonë e më me shumë respekt dhe admirim periudhën kur Vangjush Dako drejtoi bashkinë falë gjurmëve që janë kudo në këtë qytet duke filluar nga ky shesh. Qyteti është shumë herë më i bukur dhe mirëpritës falë punëve të tij. Veliera është një tjetër vepër e bukur i një transformimi thelbësor urban”, tha Rama, i cili ligjëroi pas katër kandidatëve.
Kandidatja e fundit që mori fjalën ishte ajo e Durrësit, Valbona Sako, edhe ajo e akuzuar nga opozita për përfshirjen në shit-blerje votash. /BN/
