Rama në Durrës për fushatën elektorale u prit me protesta nga mbështetësit e opozitës. Ishte në qytetin nga i cili mori edhe një goditje si pasojë e përgjimeve që vërtetuan vjedhjen e votës. Fjalinë e parë e nisi duke falenderuar pikërisht atë, që u bë prej kohësh kryefjalë e përgjimeve, Vangjush Dako. Më pas ripërsëriti edhe njëherë se PS nuk ka pas nevojë të vjedhë votat në qytetin, që sipas tij është bastion i të majtëve.
“Sot duhet thënë shumë qartë që ta dëgjojnë të gjithë se kush përpiqet të shtojë baltën mbi Vangjushin dhe mbi Bashkinë e Durrësit, nuk do që qytetarët të kujtojnë diçka. Në Durrës Vangjushi ka fituar kur në pushtet ishte Saliu me të gjithë skuadrën më të mirë që ka pasur PD në historinë e saj dhe me të gjithë mekanizmat e pushtetit, dhe mbi të gjitha format e mbrapshta të cilat si për çdo gjë tjetër nga të akuzuar janë kthyer në akuzues.
A ka njeri normal që arsyeton që e njeh historinë e këtij vendi që mund të mendojë që njeriu dhe partia e tij në Durrës që mundën Saliun dhe të ndjerin Sokokl Olldashi, Jozefina Topallin, kur ata ishin në pushtet, u dashka të blejë vota për të mundur Lulin me Gridën dhe me Salianjin. Domethënë e thënë ndryshe këtu në Durrës të kesh mundur Sokol Olldashin një nga figurat më të spikatura, një orator dhe një njeri i njohur për forcën e larmishme në fushatën elektorale kur partia e tyre ka qenë në pushtet dhe të akuzohesh se ke blerë vota për të mundur Oerd Bylykbashin.
Ajo që mbetet në gjithë këtë rrugëtim përballë lumit të baltës që vjen furishëm prej vitesh , është puna, janë veprat dhe pa asnjë dyshim Durrësi do ta kujtojë gjithmonë e më shumë me respekt, admirim periudhën kur Dako drejtoi bashkinë, falë gjurmëve që janë kudo në këtë qytet, duke filluar nga ky shesh, që ata që ishin ën qeveri e bllokuan, si të ishte një vepër tradhtie ndaj qytetit, dhe sot është zemra e një qyteti që është shumë herë më krenar sesa Dako të merrte Bashkinë.
Sheshi Velierës është një tjetër vepër e një transformimi rrënjësor urbane”, tha Rama.
