Partia Demokratike, përmes Sekretarit për Çështjet Ligjore, tha se dënimi që parashikon Kodi Penal për fshehtësinë e votës është nga 3 muaj deri në 3 vjet.
Referuar përgjimeve të publikuara nga Bild, Gjata tha se kjo vepër penale është konsumuar nga personat e kapur në përgjime.
Po kështu Gjata tha se nga përgjimet rezulton përdorimi i parave në zgjedhje duke shkaktuar atë që Damian Gjiknuri e quan si tërmet.
Në këtë kuadër, Gjata tha se Kodi Penal parashikon dënime nga 1 në 3 vjet burg për ata që shpërndajnë paranë.
Sipas demokratëve, me një drejtësi të pavarur krimet zgjedhore do të dënoheshin deri në 30 vjet burg.
Deklarata e plotë e PD
Çlirim Gjata: Përdorimi i parave në zgjedhje ka shkaktuar tërmetin për të cilin flet Damian Gjiknuri.
Nga biseda e Damian Gjiknurit me Imer Lalën dhe ajo e Imer Lalës me të nipin, kuptohet qartë përdorimi i parave në zgjedhje, madje aq shumë janë hedhur, sa siç shprehet Gjiknuri shpesh, kanë shkaktuar “tërmet” Mënyra sesi flasin tregon bashkëpunimin për vjedhjen e zgjedhjeve me përfshirjen e shumë personave. Janë Arben Keshi, drejtor në Ministrinë e Brendshme, është Krashi që u bë drejtor i OSHEE, Drini Reçi Drejtor Arsimor i Dibrës, është Bert Aga, shef i komisariatit, është Imer Lala, që i drejton të gjithë këta, si dhe Damian Gjiknuri, shefi politik i bandës. Fakti që janë dhënë para, i përfshin këta në dispozitën e Kodit Penal 328/a, që, ndëshkohet nga 1 në 3 vjet burg.
Çlirim Gjata: Përgjimet e Dibrës faktuan se me Edi Ramën nuk ka fshehtësi të votës. Dënohet nga 3 muaj në 3 vjet burg.
Përgjimet, ku zbulohet se njerëzit e Edi Ramës në Dibër mund të kontrollojnë dhe të dinë në kohë reale për kë kanë votuar qytetarët, siç është rasti i një përfaqësuesi të FRD-së në Dibër, tregojnë se për Edi Ramën fshehtësia e votës nuk vlen. Përgjimi fakton shkeljen flagrante të nenit 327 të Kodit Penal për shkeljen e fshehtësisë së votimit, që dënohet nga 3 muaj në 3 vjet burg. Çlirim Gjata thotë se nuk mund të shkohet në zgjedhje, kur këta lënë njerëz të posaçëm për të zbuluar votën në mënyrë të paligjshme. Përdorimi i punonjësve të shtetit, që nuk lejohet të merren me zgjedhje, përdorimi i policië, korrupsioni aktiv dhe fshehja e votës janë vepra që parashikohen në Kodin penal dhe janë konsumuar në përgjime. Kjo përfshin edhe mbledhjen e kartave, ku faktohet se njerëzit e Edi Ramës në Dibër i mbledhin ato ose për të mos lejuar të votohet, ose për të kontrolluar se kujt ia jep votën.
Çlirim Gjata: Babloku Edi Rama i dha garanci Imer Lalës për paprekshmërinë e personave të përfshirë në realizimin e objektivit përmes manipulimit.
Përgjimi kur Imer Lala pohon se ka takuar Bablokun, qartëson se personi me këtë nofkë është Edi Rama. Ai e takon atë në kryeministri, pasi ka realizuar që ka marrë përsipër për manipulimin e procesit zgjedhor. Fjalitë e tij tregojnë se ka marrë marrë garanci për paprekshmërinë e aksujt që vjedh zgjedhjet, pavarësisht se PD kishte kërkuar nisjen e një hetimi në bazë të një kallëzimi të bërë pak ditë m ëparë. Gjata tha se njerëzit e Ramës në Dibër mund të bënin çfarë të donin, pasi ishin të garantuar se mund të vjedhin për llogari të Edi Ramës.
Gazment Bardhi: Krimet zgjedhore duhet të ndëshkohen. Ata që janë përfshirë në vjedhjen e zgjedhjeve kanë kryer vepra që dënohen deri në 30 vjet burg.
Është jetike për vendin dhe për zgjidhjen e kësaj krize të thellë që shkelja flagrante e ligjit në bashkëpunim mes qeverisë dhe krimit për të blerë zgjedhjet, duhet të hetohet e gjykohet me paanësi dhe me shpejtësi në të gjitha dimensionet e saj, politike dhe ekonomike.
Këto janë krime zgjedhore që një drejtësi e pavarur do t’i kishte ndëshkuar me të paktën 30 vjet burg për të gjithë ata që janë përfshirë në shkeljen e ligjit. Ky është një rast për të vendosur drejtësinë që presin të gjithë, kur si Kryeministri, si krimineli, si qytetari i zakonshëm janë të gjithë të barabartë përpara ligjit.
