Policia franceze ka arrestuar 9 shqiptarë, mes të cilëve edhe të mitur, si pjesë e nja bande grabitësish që vepronte në Montpellier. Të arrestuarit akuzohen për grabitjen e të paktën 70 banesave, ndërsa policia ka sekuestruar rreth 400 sende të vjedhura, bizhuteri, makina.
Për arrestimin e bandës, janë angazhuar 130 forca të Xhandarmërisë, pasi kishte informacione se ata ishin të armatosur. Identitet e personave të arrestuar nuk janë bërë të ditur.
Operacioni nisi nga xhandarët e Policisë franceze, por morën pjesë edhe disa oficerë të GIGN (Xhandarmëria elitë), si dhe u përdorën edhe dy qen.
Operacioni nisi në orën 06:00 të mëngjesit të ditës së mërkurë në dy vila, që po mbaheshin nën vëzhgim prej disa muajsh, si dhe në një hotel në zonën e Faubourg Saint-Jaumes, midis Arceaux dhe Saint-Charles, në Montpellier.
Ata dyshohet se kanë realizuar vjedhjen e disa banesave gjatë natës, por edhe disa shtëpive të tjera, pronarët e të cilëve ishin larguar prej muajsh. CRS, Policia Kufitare, PAF e Heraultit dhe punonjësit e Policisë të Sigurisë Publike të Stacionit Qendror u përfshinë më pas në sekuestrimin e objekteve të vjedhura.
Operacioni u kodua “Alba 34”.
Prona dhe apartamente në perëndim dhe lindje të Montpellierit ishin plaçkituar nga grupi, që po mbahej në vëzhgim nga Policia. Mediat raportonin se vjedhjet ishin realizuar edhe në qytetet Saint-Georges-d’Orques, Saint-Gély-du-Fesc, Grabels, Juvignac, Pignan, Crès, Vendargues, Castries, Saint-Drézery, Sussargues, Beaulieu etj..
