Kryeministri Edi Rama i nis sot takimet e prezantimit të kandidatëve të Rilindjes për kryebashkiakë me Përmetin, ku do të prtezantojë kandidaturën e Alma Hoxhës. Ky takim do të zhvillohet në orës 09:30, ndërsa dy takimet e tjera janë programuar në orët e pasdites. Kështu Rama në orën 17:00 do të jetë në Dropull ku do të prezantohet Dhimitër Toli dhe dy orë më pas në parkun e Viroit, ku do të prezantojë kandidatin për Gjirokastrën, ish-deputetin Flamur Golemi.
Por agjenda e takimeve të Ramës në jug të vendit ka pësuar disa ndryshime. Nuk dihen arsyet e ndryshimeve në agjendën e takimeve dhe prezantimeve, por ajo që bie në sy është fakti se Rama nuk do të jetë i pranishëm në prezantimin e kandidatëve të Këlcyrës dhe Memaliajt, përkatësisht Klement Ndoni dhe Gjolek Gucaj. Ndonëse më parë Rama ishte njoftuar se do të mungonte edhe në prezantimin e Tërmet Peçit në Tepelenë, ky i fundit ka njoftuar se kryeministri nuk do të largohet nga qarku i Gjirokastrës, pa marrë frymëzimin nga Tepelena.
Nuk dihet ende shkaku i anullimit të takimeve në dy njësi vendore të qarkut të Gjirokastrës. Ka zëra që e lidhin anullimin e takimeve me problemet që i janë shkaktuar kryeministrit nga nervi shiatik dhe fakti se nuk mund të qëndrojë gjatë në këmbë.
Por një tjetër shkak mund të jenë problemet që mund të shkaktohen gjatë takimeve, për shkak të kandidatëve të përzgjedhur.
Kështu raportohet se frika është që qoftë në Këlcyrë ashtu edhe në Memaliaj të ketë një braktisje të takimit nga banorët e dy bashkive, kjo për faktin se edhe vetë socialistët kanë pasur rezerva të forta për përzgjedhjen e kandidatëve.
Në Këlcyrë, Ndoni duket se me projektin e tij për shembjen e 30 objekteve në qendër, ka shkaktuar jo pak probleme, gjë që mund të krijojë probleme në takimin e kryeministrit. Ndërsa në Memaliaj kandidatura e përzgjedhur është kundërshtuar nga vetë strukturat e PS-së, madje edhe me peticione drejtuar Ramës.
Në një situatë të tillë, për të shmangur irritimin e banorëve apo vetë socialistëve, apo në rastin më të mirë braktisjen e takimeve, stafi i kryeministrit duket se ka menduar një rishikim të agjendës së takimeve, dhe anullimin e pjesëmarrjes së tij në bashkitë e Memaliajt dhe Këlcyrës.
