Kreu demokrat Lulzim Basha ka mbyllur protestën e 9 të opozitës së bashkuar me një fjalim në selinë e PD-së, atje ku janë mbledhur një pjesë e të pranishmëve në protestë.
Basha shprehu një falenderim për të gjithë qytetarët që nuk ranë pre e provokimeve.
Kreu demokrat theksoi se përveç kushtetit të panegociueshëm për largimin e Edi Ramës dhe krijimin e një qeverie tranzitore, një tjetër kusht i panegociueshëm është përballja me drejtësinë dhe prangat e burgut për cilindo që ka vjedhur votat e shqiptarëve, sikundër provohet në përgjimet e publikuara nga Bild.
Basha i ka drejtuar një mesazh të fortë Sandër Lleshajt dhe drejtuesve të policisë, që sipas tij kanë arrestuar ish-deputetin Bardh Spahia dhe mbështetësit e opozitës, që i cilësoi si të burgosur politikë, se do e kenë ata vendin në qelitë ku sot ndodhet Spahia dhe qytetarët që luftojnë për një Shqipëri si gjithë Europa.
“Sot u bashkuan shqiptarët kundër krimit, për një Shqipëri si gjithë Europa”, tha Basha.