Ka nisur protesta e thirrur nga opozita e bashkuar, kundër kryeministrit Edi Rama. Me thirrjet “Rama ik”, mijëra qytetarë nga i gjithë vendi ndodhen në bulevardin “Dëshmorët e Kombit”, poshtë zyrës së Edi Ramës, ndërsa ky i fundit është larguar nga Tirana prej disa orësh.
Marshi i Barabait është sot marshi i rezil-kryeministrit
“Marshi i Barabait”, një nga poezitë simbol të Fan Nolit po lexohet në protestë nga pedagoge Taulanta Jaupi. Marshi i rezilit, i katilit, i tradhëtorit që na nxiu e na la pa atdhe, marshi i atij që na solli varfërinë, poshtërsinë dhe robërinë është sot marshi që i shkon për shtat një qeverisjeje kriminale që po i lë shqiptarët pa atdhe, që po i lë pa pasuri dhe që po i grabit përditë për derbederat, ujqërit dhe derrat në qeveri. Rezili, katili dhe tradhëtori ynë, është siç thotë poeti Fan Noli, i çgryer, i zhyer dhe i vyer për hu, prandaj shqiptarët janë bashkuar në protestën më të madhe të 30 viteve pluralizëm.
Marshi i Barabajt
Allalla, o rezil e katil, allalla,
Shtroni udhën me hithr’ e me shtok turfanda,
Gumëzhit, o zinxhir e kamçik, baterma,
Lehni, laro, kaba: Hosanna, Barabba!
Tradhëtor, ti na nxive, na le pa atdhe,
Ti na çthure, na çkule, na çduke çdo fè,
Varfëri, poshtërsi, robëri ti na dhe,
Derbeder, ujk e derr: Hosanna, Barabba!
0 stërnip i Kainit, tepdil si bari,
Ti na shtyp e na shtryth e ti gjakun na pi,
Ti na ther e na grin e për qejf na bën fli;
0 kokuth e lubi: Hosanna, Barabba!
Në budrum, nëpër llom’ e kufom’ u mallkofsh,
Në skëterrën, katran e tiran, u harbofsh,
Me tam-tam e allarm’ e me nëm’ u shurdhofsh,
Në zëndan mbretërofsh: Hosanna, Barabba!
0 i çgryer, i zhyer, i vyer për hu,
Turp-e-ndot-kundërmonjës të krusen mbi gju
Dallkaukët, kopukët e turmat pa tru,
Zëmër-krund-e-gërdhu: Hosanna, Barabba!
Allalla, o rezil e katil, allalla,
Shtroni udhën me hithr’ e me shtok turfanda,
Gumëzhit, o zinxhir e kamçik, batërma,
Lehni, laro, kaba: Hosanna, Barabba!
