Liria e shtypit dhe medias në Shqipëri është përkeqësuar. Konstatimi vjen nga delegacioni ndërkombëtar i gazetarëve pas takimit me kolegë shqiptarë, me përfaqësues të shoqërisë civile dhe ambasadat e huaja në Tiranë.
Sipas delegacionit, gazetarët po përballen me sulme fizike, gjuhë denigruese nga zyrtarët më të lartë publikë si dhe me mungesë informacioni dhe transparence, kjo e fundit veçanërisht nga administrata e kryeministrit Edi Rama dhe kryetarit të Bashkisë së Tiranës, Erion Veliaj.
Delegacioni ka shprehur shqetësim edhe për propozimet e bëra për ndryshimet në legjislacionin mbi median “online”, për gjobitjen dhe mbylljen e tyre pa urdhër gjykate. Gazetarët e huaj rekomanduan që Shqipëria të anulojë ligjin penal të shpifjes dhe fyerjes.
Delegacioni ndërkombëtar i shprehu qëndrimet e tij edhe gjatë takimit me kryeministrin Edi Rama, ndërsa kryebashkiaku Erion Veliaj refuzoi takimin me ta.
