Ngjarjen ende të paqartë që ndodhi mbrëmjen e së dielës me gjyqtarin e Tiranës Artan Gjermenin, policia e konsideron si plagosje me thikë dhe jo gërvishtje aksidentale.
“Panorama” shkruan sot se sipas një raporti paraprak të ekspertëve, në trupin e gjyqtarit Artan Gjermeni janë përcaktuar 4 plagë të shkaktuar nga një mjet mprehës, thikë. Gjermeni ka një plagë në dorën e djathtë, një në qafë, një tjetër në buzë, si dhe një tjetër që konsiderohet plaga më e rëndë, edhe pse pa ndonjë problem serioz, e ka në mes të brinjëve. Në raportin mjekoligjor saktësohet se plaga më e thellë e konstatuar është mes brinjëve 5 dhe 6, por nuk ka prekur mushkërinë.
Ndërkohë, sipas një tjetër të përditshmeje, gazetës “Shqip”, mësohet se është marrë edhe dëshmia e një femre në ambientet e Policisë së Tiranës. Një pistë paraprake po qarkullon në portale të ndryshme, sipas së cilës plagosja është shkaktuar nga një femër dhe ka ardhur për shkaqe morale, por policia tregohet tepër e rezervuar në këtë aspekt, duke mos dhënë asgjë rreth kësaj teze të hamendësuar.
Ndërsa një tjetër fakt që bie në sy, është se të paktën 6 burra, të moshës 40 deri në 50 vjeç janë paraqitur dje në ambientet e Drejtorisë së Policisë së Tiranës, duke bërë të njëjtën pyetje “Ç’u bë me gjyqtarin, dihet gjë kush e plagosi?”. Burimet policore thanë për “Shqip” këtë interesim, shtojnë se personat janë paraqitur në sportelin e policisë së kryeqytetit dhe kur janë pyetur nga punonjësit se “përse interesoheni, çfarë lidhje keni ju me gjyqtarin?”, ata janë përgjigjur shkurt “për kuriozitet” dhe nuk kanë pranuar të identifikohen.
/DurrësLajm
