I ftuar në studion e emisionit Tempora, ish kryeministri Sali Berisha ka numëruar një për një të gjitha gabimet që ka bërë Edi Rama. Ai është shprehur se gjatë qeverisjes së tij ka bërë edhe gabime, të cilat i ka pranuar, por Rama, sipas tij, ka ngritur pushtetin e mafies.
Por a e ka gjithë fajin Sali Berisha? Përgjigja e tij është e gjatë dhe e detajuar. Madje i numëron Ramës të gjitha mangësitë duke renditur edhe punët që ai ka bërë në tetë vite.
“A ndjeni ndonjë faj ju për situatën ku ndodhet Shqipëria në 2019”, u pyet Berisha.
“Që të dy si Rama dhe Veliaj nuk janë gjë tjetër veçse nuk janë qeveri. Ata kanë 6 vjet në pushtet, por nuk kanë ndërtuar pushtetin e ligjit por të mafies dhe natyrisht këtu ndahen me mua ata për jetë a vdekje. Së dyti, kompleksin e Edit njerëzit nuk e dinë se sa i tmerrshëm është dhe që krijohet që në moshën 1 vjeç e gjysmë. Ai është një arenë kompleksesh dhe ai ka 6 vjet që unë nuk jam në pushtet dhe ai thotë ashtu, thua ti or ai është. Sali Berisha nuk ka aktualisht asnjë lloj pushteti përveçse atë të fjalës së tij që e ka çdo qytetar i këtij vendi. Unë kam hequr dorë nga çdo lloj pushteti, por tani a më shqetëson mua kjo që ata betohen me kokën time? Unë i ftoj që të paktën tre herë në ditë të bëjnë atë. Përgjegjësitë e mia unë i kam pranuar, skemat piramidale dhe gabimet e tjera. Shqipëria eci pandalshëm derisa e bllokoi Rama me tre ligje statusin. Mori marrëveshjen, liberalizoi vizat. Shqipëria jashtë imagjinatës së njerëzve, arriti të marrë ftesën për në NATO. Në 8 vite në këtë vend u ndërtua një infrastrukturë rrugore, jo e përsosur por nuk është ajo që ishte. Paratë nuk vidheshin, por derdheshin në vepra publike. Nuk them se nuk kishte korrupsion. Tuneli i Krrabës u ndërtua me 14 mln euro kilometri ky po ndërton në fushë me 22 mln euro kilometra. Një qeveri nuk ka përgjegjësi se çfarë bënë ai që vjen prapa”, u shpreh Berisha.
