Ish-trajneri i Italisë dhe Bajernit të Mynihut Giovanni Trapattoni ka folur për ndeshjen mes Gjermanisë dhe Italisë ku vlerëson në maksimum skuadrën e Antonio Contes.
Gjatë një interviste për “ANSA”-n Giovanni Trapattoni thekson se Gjermania i trembet Italisë e cila sipas tij edhe në ditën më të keqe mposht panzerat.
“Ndihen gjithmonë shumë të fortë, më të fortë se të tjerët, por pastaj vijmë ne të vegjlit, gjithmonë polemizues, me shumë mëkate dhe në fund, gjenitë jemi sërish ne. I vëmë dhe dimë t’i vëmë gjithmonë në vështirësi, në krizë. Unë jam nga ata që them gjithmonë të vërtetën dhe për mua, kjo ndeshje do të përfundojë njësoj si në gjysmëfinalen e Botërorit të vitit 2006. Koha e rregullt do të përfundojë barazim dhe në kohën shtesë, aty pastaj shënojmë dhe kualifikohemi ne”, u shpreh Trapattoni.
Në lidhje me atë që përbën pikën e fortë të skuadrës së Italisë të ndërtuar nga Antonoi Conte, Giovanni Trapattoni nënvizoi formën fizike dhe dëshirën për t’u sakrifikuar.
“Nuk ka dyshime se tashmë Gjermania është një armatë futbollistike, por të thuash që sot për sot kjo diferencë nuk mund të ngushtohet me ata është pa sens. Kombëtarja e Contes tregoi realisht se, ashtu siç thotë ai, ajo është si një skuadër klubi, jo një përfaqësuese. I keni parë sesi vrapojnë tre veta menjëherë për të rikuperuar topin kur një prej shokëve të tyre e humbet?! Dhe pikërisht ky shpirt sakrifice në ndeshje kaq të rëndësishme si Itali-Gjermani, mund të vlejë më shumë sesa cilësia dhe teknika”, përfundoi Trapattoni.
