Gjatë ditës së sotme, maturantët i janë nënshtruar privimit të Matematikës, si provimi i tretë i detyruar për Maturën Shtetërore. Në rrjetet sociale po shpërndahet masivisht një kopje e tezës, ç’ka e bën nul procesin e organizimit të provimit, dhe masat e marra edhe me punonjës policie shtesë. Një prej denoncimeve është dhe ai i ish-deputetit demokrat Luçiano Boçi, i cili shkruan:
Çfarë i ka ngelur Besës dhe Ramës për të thënë kur teza e matematikës del që në 10.00 ende pa filluar provimi? Për çfarë do t’i flasin maturantëve këta derdimenë, dallkaukë e mashtruesë kalibri?! Për meritë?! Për drejtësi?! Për cilësi?!
Pafytyrësia e tyre kalon çdo cak.
Apo për modelin e hajdutërisë, krimit, grabitjes së meritës, pelivanllëkut të poshtër që po e instalojnë që në gjenezë të brezave?! Këtë po! Këtë e bëjnë çdo ditë me pasion. Prandaj merreni këtë paçavure! Merreni e quajeni si të doni. Fushatë karrikesh, gallatë arsimore, kënetë shkollash, tallje masive maturantësh, poshtërim dijesh…
Por Maturë Shtetërore mos e quani më! Edhe asaj i keni dhënë pamjen e shëmtuar dhe përbuzëse të qeverisjes suaj!
Besa largohu një orë e më parë…
Maturantët nuk janë FBI-ja, por janë e ardhmja e vendit, të cilët sot ju po e merrni në qafë…
Kujtojmë se edhe gjatë dy provimeve të tjera që janë zhvilluar për Maturën Shtetërore, tezat e tyre janë bërë publike në internet duke shkaktuar një skandal të vërtetë. Shumë prej fotove kanë dalë nga vetë studentët të cilët janë munduar të gjejnë zgjidhjet e pyetjeve nëpër rrjetet sociale, ndërsa sot, teza e provimit është publikuar ende pa nisur provimi. Dikush të anullojë Maturën Shtetërore 2019! Si mund të merren për bazë rezultatet e 3 provimeve tezat e të cilave janë publikuar gjërësisht në rrjetet sociale? Çfarë interesi ka Ministria e Arsimit të fshihet pas skandaleve të tilla që jo vetëm denigrojnë figurën e këtij institucioni por edhe baltosin mundin dhe djersën e qindra nxënësve që kanë studiuar dhe marrë provimet falë vullnetit dhe dijeve të tyre.
