Akademiku Artan Fuga ka reaguar me anë të një letre publike më lidhje me çregjistrimin e menjëhershëm nga ana e KQZ-së, të kreut ekzistues të Partisë Social Demokarate, Skënder Gjinushi.
Fuga i është drejtuar për këtë çështje me një letër botuar në gazetën “Panorama” përkatësisht pesidentit të Republikës, Ilir Meta, kryeministrit Edi Rama, kryetarit të Partisë Demokratike, Lulzim Basha dhe kryetarit të OSBE-së, Bernd Boschart.
Në letër Fuga thotë se KQZ-ka ka marrë një vendim të paligjshëm në datën 6 qershor, duke çregjistruar emrin e kryetarit ekzistues të PSD-së, Skënder Gjinushi dhe zëvendësuar atë me një emër tjetër.
Sipas akademikut, “e gjitha kjo është bërë duke marrë në shqyrtim po në datën 6 qershor një vendim gjykate të Rrethit Gjyqësor Tiranë, i nxjerrë po në datën 6 qershor.”
Precedenti që Fuga ngre në letrën e tij publike drejtuar krerëve më të lartë të shtetit, është se KQZ-ka e ka marrë këtë vendim me një “shpejtësi supersonike, siç thotë vetë Akademiku.
“KQZ ndalohet ligjërisht të marrë një vendim atë ditë që e ka marrë për zëvendësimin e kërkuar të emrave në krye të Partisë Social Demokrate”, shkruan Fuga.
Sipas tij, vendimi i Gjykatës, sipas ligjit, duhej maturuar për 15 ditë dhe vetëm pastaj mund të bëheshin veprime bazuar në të. Fuga pohon publikisht se zgjedhja e kryetarit të Akademisë së Shkencave është i paligjshëm dhe, sipas tij, këtë e vërtetojnë si vendimi i Gjykatës, ashtu edhe vendimi i paligjshëm i KQZ-së.
“Në kundërshtim me ligjin mbi Akademinë e Shkencave, ai ka qenë njëkohësisht edhe kryetar partie dhe anëtar i Akademisë së Shkencave, çka ligji e ndalon; se ka zhvilluar fushatën e tij zgjedhore njëkohësisht me fushatën elektorale për zgjedhjet e 30 qershorit, pra duke qenë kryetar partie; dhe se ditën e zgjedhjes së tij të paligjshme në krye të Akademisë së Shkencave ka qenë ende ligjërisht kryetar partie”, shkruan Akademiku Fuga.