Kryeministri Rama ka arritur të kalojë në aksin Korçë- Pogradec, për të vijuar takimin e tij elektorale për prezantimin e kandidartit socialist në qytetin juglindor.
Eskorta e kryeministrit ka arritur të tejkalojë me shpejtësi turmën e dhjetra protestuesve qytetarë dhe simpartizantë të Partisë Demokratike, të mbledhur në këtë aks për të protestuar kundër tij.
Burime bëjnë me dije se eskorta e kryeministrit është larguar nën brohorimat e protestuesve “Rama ik”, ndërsa nuk ka patur incidente, por vetëm një çadër të hedhur në rrugë.
Kujtojmë se dhjetra protestues u mblodhën sot për të pritur kalimin e kryeministrit Rama, për takimin elektoral të orës 18:00 në Pogradec. Të pranishëm në protestë kanë qenë edhe ish-deputetët Klevis Balliu dhe Ervin Salianji.
Gjithashtu mësohet se protestuesit kishin edhe domate me vete, por ua hoqi policia. Ish-deputeti Salianji ka debatuar me policinë duke iu kërkuar këtyre të fundit të hapnin rrugën.
