Kryeministri Edi Rama ishte në premten në qarkun e Elbasanit, ku prezantoi kandidatët për kryebashkiakë të Rilindjes.
Gjatë udhëtimit në Librazhd, Rama u detyrua që të ndryshojë drejtim, për shkak të protestave të qytetarëve me thirrjet “Rama ik”, duke shkaktuar edhe reagimin më të ashpër ndaj kryeministrit.
Në fakt shumëkush mund të jetë habitur sesi nga zona e Taulant Ballës mund të kishte një reagim aq të ashpër, po të kihet parasysh fakti se deputeti socialist që drejton edhe grupin e PS si dhe mban postin e Sekretarit të Përgjithshëm të kësaj partie, vazhdimisht mburret dhe flet për fitore të thella.
Por ndoshta një nga arsyet sepse qytetarët u shfaqën të revoltuar, përveç varfërisë, papunësisë, dhe 1001 shkaqeve të tjera që lidhen me jetën e përditshme, është edhe fleta e votimit, që po e japim më poshtë.
Në fletën e votimit ka vetëm një emër, ai i kryebashkiakut aktual Kastriot Gurra. Nuk ka alternativë, madje ka kaluar edhe fletë-votimet e kohës së diktaturës, kur kishte nga një kandidat nga Fronti Demokratik, Bashkimet Profesionale apo Organizatat e Rinisë.
Gurra është i vetëm, pa kandidatë rivalë, ndërsa alternativa që kanë banorët e Librazhdit është: ose të votojnë për të, ose të bojkotojnë votimet e Ramës.
Në fakt kjo fletë votimi përsëritet në mbi 30 bashki, ku kandidatët e Ramës nuk kanë asnjë alternativë, ndërsa në bashkitë e mbetura ka emra nga organizatat që i janë bindur dëshirës të kryeministrit për të bërë votime.
Kur shikon fletën e votimit gjithkush mund të mendojë për milionat e shpenzuara për këto copa letrash, që në fakt nuk shërbejnë për asgjë tjetër, ndërsa fondi mund të përdorej qoftë edhe për të rregulluar kopshte, çerdhe e shkolla, apo për të ndihmuar familjet në nevojë.
