Kryeministri Edi Rama shprehet kudër qëndrimit të Presidentit maqedonas Stevo Pendarovski, lidhur me integrimin në BE.
Presidenti i Maqedonisë Veriore Stevo Pendarovski, kërkoi që vendi i tij të trajtohet i “veçuar” nga Shqipëria fqinje. Druajtja e tij është se kur Bundestagu të shqyrtojë çështjen në qershor atëherë “paketa dyshe” do të dëmtojë Maqedoninë. “Problemi më i madh është ‘ndarja’ me Shqipërinë. Shqipëria tani është në rrëmujë. Opozita është larguar nga institucionet dhe po bëhet më e tensionuar. Pra, çfarë mund të themi këtu? Kemi pasur rekomandime pozitive nga Komisioni më parë, dhe ne jemi ‘veçuar’“, tha ai.
Ndërkohë, kryeministri Edi Rama e quan jo të drejtë qëndrimin e Presidentit maqedonas.
“Presidenti @SPendarovski nënkupton favorizimin e ndarjes nga Shqipëria në vendimin për negociatat? Çudi kjo qasje, sidomos kur konsideron kontributin kyç të Shqipërisë&shqiptarëve në zhvillimet demokratike&rrugën europiane të shtetit mik. S’duket as e drejtë as praktike faktikisht”, shkruan Rama në një postim në Twitter.
