Kryeministrit Edi Rama i janë rritur ndjeshëm masat e sigurisë. Gjatë lëvizjeve të tij nga një qytet në tjetrin, janë të paktën 13 makina që e shoqërojnë, ku përveç eskortës së Gardës së Republikës, janë të angazhuar edhe trupa RENEA, por edhe forca të policisë, që ose paraprijnë eskortat me makinat e tyre, ose shoqërojnë në distancë të afërt makinat që përfshihen në eskortën zyrtare të Kreut të Qeverisë.
Por një foto që qarkullon së fundmi tregon se Rama ruhet së paku nga 7 truproja, që qëndrojnë jo më larg se 5-6 metra larg tij, në formën e një gjysëm rrethi, dhe po kaq i paraprijnë lëvizjeve të kryeministrit.
Pra janë rreth 14 truproja që qëndrojnë pranë Ramës, në një kohë kur nga vetë ai flitet për rend dhe siguri.
Dikur shfaqej në publik me vetëm 1 truprojë, që i qëndronte pranë dhe ajo ishte një oficere e Gardës. Ndërsa sot vështirë se mund të numërohen.
Atëherë pyetja që lind është se nga çfarë ka frikë kryeministri?
Ndoshta protestat qytetare në çdo qytet kanë detyruar institucionet e sigurisë të marrin masa të shtuara për të mbrojtur Ramën, madje duke angazhuar edhe trupat e FNSH-së që qëndrojnë në gadishmëri për të ndërhyrë, sikundër ndodhi në Librazhd.
