Kryeministri Edi Rama ka folur sërish për dekretin e Presidentit Ilir Meta i cili rrëzoi 30 qershorin si datë e zgjedhjeve lokale.
Në një miting nga Patosi, në kuadër të zgjedhjeve për 30 qershorin, edhe pse kjo datë është rrëzuar me dekretin e kreut të shtetit, Rama këmbënguli se zgjedhjet do të zhvillohen pikërisht në këtë datë.
“Sidomos Meta i fryn konfliktit civil, përplasjes së popullit, 97-ës së dytë dhe për të gjitha këto është shumë i shqetësuar saqë në mesin e fushatës ndërhyri për të bërë një marrëzi duke fshirë firmën e tij me firmën e tij. Nëse Meta është vërtet i shqetësuar e ka të thjeshtë ti thotë Monikës të qetësohet ti thotë dhe Saliut të qetësojë Lulin dhe nuk ka më njeri që del në rrugë. Në 30 qershor do bëjmë zgjedhje”, tha Rama.
Ndërkohë, qëndrimi nga Presidenca ka qenë i qartë: Dekreti i Presidentit është në fuqi dhe zgjedhje në 30 qershor nuk ka.
Opozita nga ana tjetër, jo vetëm që ka mbështetur vendimin e Presidentit, por ka paralajmëruar një protestë tjetër kombëtare “shumë shpejt”. Opozita mbetet e palëkundur në qëllimin e saj për largimin e Ramës nga postimi i kryeministrit si kusht për garantimin zgjedhje të lira e të ndershme.
