Nënkryetari i Komisionit Qendror të Zgjedhjeve, Denar Biba ka deklaruar se kryebashkiakët e opozitës të cilët njohën dekretin e Presidentit Meta për zgjedhjet do procedohen penalisht.
“Kemi patur disa problematike me kryetarë bashkishë të së djathtës, të cilët duke mos njohur datën e zgjedhjeve nuk po bashkëpunojnë për përgatitjet. Ju kujtoj zotërinjve se pengimi i zgjedhjeve është vepër penale dhe shumë shpejt do të ketë kallëzim për ta”, u shpreh përfaqësuesi i PS në KQZ, në emisionin ‘Top Talk’ në Top Channel.
Deklarata e Bibës vjen në vazhdën e injorimit të dekretit të kreut të shtetit për shtyrjen e zgjedhjeve, gjatë vendimmarrjeve në KQZ, ku ai është nënkryetar. Ditën e sotme, bashkitë e drejtuara nga opozita, njohën dekretin e Metës për zgjedhjet. Ata kërkuan nga Komisionet e Administrimit Zonal të Zgjedhjeve lirimin e të gjitha ambienteve në funksion të procesit zgjedhor.
Ndërkohë, President Meta duke ju referuar KQZ, paralajmëroi se çdo institucion që refuzon zbatimin e dekretit të Presidentit do të përballet me pasoja ligjore.
Qëndrimi i Bibës është në një linjë me atë të kryeministrit Edi Rama.
