Presidenti Ilir Meta duket se po shkon drejt shpërndarjes së parlamentit dhe rrjedhimisht zgjedhjeve parlamentare të parakohshme.
Presidenca i ka dërguar kreut të KQZ-së Klemend Zguri një shkrese, ku kërkon mes të tjerash edhe informacion mbi numrin e deputetëve.
Më herët, aktorë politikë kanë hedhur idenë se nëse parlamenti nuk ka 140 deputetë, që është edhe rasti aktual, Presidenti duhet të shpërndajë parlamentin dhe vendi të shkojë në zgjedhje të parakohshme. “Ekziston mundësia ta shpërndajë, nëse nuk e bën do të jetë një gafë e madhe. Ai e ka për detyrë, kur një parlament nuk ka 140 deputetë, Presidenti me një dekret duhet ta shpërndajë. Meta është politikan karriere, nuk është frikacak që fshihet pas procedura”, u shpreh dje Nard Ndoka, kreu i PDK-së.
Me këtë lëvizje, Meta duket se po shkon pikërisht drejt shpërndarjes së parlamentit.
***
Letra e Presidentit Meta
I nderuar zoti Kryetar,
Komisioni Qëndror i Zgjedhjeve, me vendim nr.555, datë 26.07.2017 ka shpallur rezultati përfundimtar të zgjedhjeve të datës 25.06.2017, si dhe ka miratuar numrin e mandateve dhe listën emërore të deputetëve të zgjedhur në çdo zonë zgjedhore për çdo subjekt dhe numrin e mandateve dhe listën e deputetëve të zgjedhur në shkallë vendi.
Në muajin shkurt 2019, deputetët e partive opozitare kanë deklaruar publikisht dhe kanë depozituar pranë Kuvendit të Shqipërisë dorëheqjen në bllok nga ushtrimi i mandateve të tyre si deputetë në Kuvendin e Shqipërisë.
Nga sa është bërë publike, Sekretari i Përgjithshëm i Parlamentit, pa vonesë ka lajmëruar KQZ-në për krijimin e vakacave në Kuvendin e Shqipërisë, si pasojë e këtyre dorëheqjeve.
Komisioni Qëndror i Zgjedhjeve ka marrë vendimin për dhënien e mandatit të deputetit të Kuendit të Shqipërisë, për kandidatët sipas listës shumë-emërore të çdo subjekti zgjedhorë, për çdo zonë zgjedhore.
Në vlerësim të kësaj situate dhe në mbështetje të nenit 92/h të Kushtetutës të Republikës së Shqipërisë si dhe referuar vendimmarrjes së deritanishme të Komisioit Qëndror të Zgjedhjeve për zëvendësimin e deputetëve të dorëhequr dhe dhënien e mandatit të deputetëve të kandidatëve sipas listës emërore për çdo subjekt zgjedhor, Presidenti i Republikës, kërkon nga ana Juaj dhënien e një informacioni dhe të dhëna të sakta për sa më poshtë:
– Cili është numri aktual i mandatëve të deputetëve të Kuvendit të Shqipërisë në shkallë vendi?
– Vënien në dispozicion të listës emërore të deputetëve aktual të Kuvendit të Republikës së Shqipërisë, për çdo zonë zgjedhore për çdo subjekt si dhe listën emërore të deputetëve aktual në shkallë vendi.
Presidenti i Republikës kërkon dhënien e këtij informacioni në një kohë sa më të shkkurtër dhe shqyrtimin e kësaj kërkese me përgjegjësi të lartë shtetërore.
Duke ju falenderuar për bashkëpunimin Tuaj!
/BN/
