Nga Boldnews.al
Kryeministri Rama ka një qetësi të frikshme, në Parlament konfirmoi se me bilbilin e tij është në gjendje që të rreshtojë 100 a më shumë deputetë të bindur, për të votuar çdo nismë të tij. Të shkarkojë presidentin, të ndryshojë Kushtetutën, të aprovojë çdo ligj e nismë personale me shumicë të cilësuar…. Faktet u dhanë sot. Ata nuk janë më “deputetë të lirë”, por dele të bindura që shkojnë pas “bariut Rama”.
Me 100 vota pro, shtatë kundër dhe 2 abstenim, Parlamenti votoi sot rezulotën kundër presidentit Ilir Meta, i cili shdekretoi (anuloi), datën e zgjedhjeve lokale të 30 qershorit. “Kuvendi i Shqipërisë i bën thirrje Presidentit të Republikës të reflektojë duke kthyer institucionin e Presidentit në kufijtë e kompetencave të njohura nga Kushtetuta dhe të mos ndërrmarrë asnjë veprim tjetër në shkelje flagrante të Kushtetutës”, thuhet në rezolutën e miratuar me një shumicë të frikshme, ose 30 deputetë më shumë se grupi Parlamentar i Partisë Socialiste.
Për të shkarkuar kreun e shtetit nevojiten 93 vota, por me votimin e sotëm, nëse Rama do ti bjerë sërish “bilbilit” të tij, mund të mbledhë më shumë se 100 vota për të shkarkuar kreun e shtetit. Kjo nuk është një matje force, dhe shantazh, por tregues se praktiakisht jemi në system diktatorial, ku kryeministri Edi Rama kontrollon gjithçka.
Më shumë se deputetët e rinj të vetëshpallur “opozitarë”, bien në sy edhe një pjesë e Grupit Parlamentar të Partisë Socialiste, të cilët edhe pse mund të mendojnë ndryshe (të paktën në shtëpi para familjes, apo në grupe të ngushta miqësore dhe shoqërore), nuk e tradhtojnë komandantin e tyre legjendar, të dashurin shok, Edi Rama…
Ku ishte Bushati, Xhafaj, Majko, Fino, Ulqini, Angjeli dhe ndonjë deputetë tjetër me “xhaketë socialisti” që ulërasin se kanë “shtyllë kurrizore” dhe nuk janë ca marioneta të rëndomta të Edi Ramës? Ata sot edhe pse në fjalime u dukën se nuk ishin dakord për shkarkimin e Metës, por në votim u treguan “dele të bindura”, që shkuan pas tufës së madhe që i drejton “çobani”…
Ata sot konfirmuan se nuk kanë më gjak socialist, por një miksim mes neokomunistëve dhe krijesës hibrite të Rilindjes së Edi Ramës. Nuk na çudisin Spiropalët, Bushkat, Manjat dhe Gjiknurët e Parlamentit, por disa personazhe që kanë 28 vjet në jetën politike të Partisë Socialiste, që drejtuan shtetin, u përballën me sfidat e vendit dhe u sprovuan se dinin të dilnin kundër liderve të partive. Sot ata janë shuar, venitur deri në sakrifikim, gati në një “tredhje orale”, duke hequr gjuhën dhe një pjesë të mendjes së gjykon.
Në rezolutë tashmë të miratuar nga Parlamenti, maxhoranca e konsideron dekretin për anulimin e zgjedhjeve të 30 qershorit, një akt të paprecedentë që synon të mohojë realizimin e së drejtës kushtetuese të shtetasve shqiptarë për të zgjedhur përfaqësuesit e tyre në pushtetin vendor.
“Kuvendi i Shqipërisë vlerëson se akti i Presidentit datë 10.06.2019 për shfuqizimin e dekretit nr. 10928, datë 05.11.2018 “Për caktimin e datës së zgjedhjeve për organet e qeverisjes vendore”, është një akt absolutisht i pavlefshëm, i nxjerrë në kapërcim të kompetencave kushtetuese dhe ligjore të institucionit të Presidentit dhe si i tillë ai konsiderohet nul dhe sikur nuk ka ekzistuar asnjëherë”-theksohet në rezulutën që sot mori 100 vota në Parlament.
Në këtë “Parlament pluralist” që e quajnë një pjesë e ndërkombëtarëve. Në këtë mexhlis që gjoja përfaqëson gjithë shqiptarët, Rilindas, Demokratë apo të pa parti. Pyetja që vetishëm ngrihet dhe mban pezull një komb të tërë është deri kur do ketë fund marrëzia se do shkohet në zgjedhje lokale pa opozitën, ku PS me ngjyrat e Rilindjes do numërojë më 1 korrik 61 bashki të marra prej saj, duke konfirmuar se zyrtarisht do jemi monopartitizëm. Me Parlament totalisht nën urdhrat e Ramës, tashmë nuk ka mbetur gjë tjetër përveçse edhe zyrtarisht kryeministri të shpallet Monark, 29 vite pasi vendi kishte fituar pluralizmin politik.
