Këshilltari Ligjor i Presidentit të Republikës, Bledar Dervishaj, në një deklaratë për mediat tha se në vend të diskutimeve mbi argumentet ligjore, Kushtetuese dhe llogjikës lidhur me çdekretimin e zgjedhjeve më 30 qershor, u lëshuan akuza, sulme dhe retorikë politike ndaj Presidentit Ilir Meta.
“Dekreti i Presidentit për shfuqizimin e zgjedhjeve më 30 qershor, bazohet tërësisht në Kushtetutë, është në fuqi dhe i zbatueshëm nga të gjithë.
I mbështetur në dispozitat kushtetuese, referuar argumenteve kushtetuese, e bën dekretin e Presidentit një akt të veçantë dhe askush përveç Gjykatës Kushtetuese nuk mund të bëjë vlerësimin e tij.
Dekreti i është dërguar KQZ-së, e cila e ka detyrim ligjor t’a zbatojë atë.
Çdo institucion që nuk është dakort me dekretin, është i lirë të ngrejë pretendimet e tij në çdo gjykatë të çdo niveli, dhe në Gjykatën Kushtetuese.
Vendimi është marrë në përgjegjshmëri të plotë për të shmangur çdo mundësi për një konflikt destabilizues që mund të kulmonte me një përplasje më 30 qershor.
Qytetarët do të votojnë përtej 30 qershorit, në një datë sa më të afërt, në një situatë më të qetë, në mënyrë të lirë dhe të ndershme.
Presidenti do të shprehet me dekret për caktimin e një date të re”, tha Dervishaj.
Sipas tij, ligji për qeverisjen vendore përcakton qartë se kryetarët në detyrë vijojnë mandatin deri në zgjedhjen e kryebashkiakëve të rinj.
“Deklaratat se mandatet e kryebashkiakëve ndërpriten është një trillium politik”, tha Dervishaj, ndërsa në emër të Presidentit ftoi palët në një dialog për zgjidhjen e krizës dhe caktimin e një date të re.
“Presidenti garanton shqiptarët se është në detyrë dhe është i gatshëm të ndërmarrë çdo hap që përcaktohet në Kushtetutë për të mirën e qytetarëve”, tha Dervishaj.
