Nga Boldnews.al
Vetëm pak orë pas publikimit të audio-regjistrimit, ku Agron (Geron) Xhafaj diskutonte me Albert Veliu për trafik narkotikësh, kryeministri Edi Rama deklaroi se “regjistrimi i vëllait të Ministrit të tij të Brendshëm Fatmir Xhafaj, ishte analizuar nga një studio prestigjoze e huaj dhe është vërtetuar që është e sajuar”.
Kjo deklaratë e Ramës, e cila për shumëkënd ishte një blof për të dalë nga situata e vështirë, gjithësesi, kishte mundësi për t’u verifikuar zyrtarisht nëse ishte e vërtetë apo jo.
Në procesin gjyqësor “Babale”, ku janë aktualisht të pandehur 4 persona për “kallëzim të rremë”, avokati i gazetarit Jetmir Olldashi, ka kërkuar që të pyetet si dëshmitar kryeministri Edi Rama.
Por gjyqtari i çështjes, Artan Gjermeni, i cili po vijon procesin në kundërshtim flagrant me ligjin pas kërkesës së bërë nga të pandehurit për përjashtimin e tij, e rrëzoi kërkesën e mbrojtjes për të marrë dëshminë e Edi Ramës.
Gjermeni, i njohur për lidhjet e tij të ngushta me Partinë Socialiste, me anën e këtij vendimi të ndërmjetëm, shpëtoi kryetarin e PS-së nga dalja blof para opinionit publik, në tentativën e tij të dështuar për të mbrojtur Fatmir dhe Agron (Geron) Xhafaj.
Nëse Edi Rama do të pranohej si dëshmitar, ai do të ishte i detyruar të paraqiste para gjykatës provat mbi të cilën mbështeti deklarimin e tij, përfshirë ekspertizën, të cilën, sipas tij “e kishte kryer në një studio prestigjioze”.
Po ashtu, gjyqtari Gjermeni refuzoi të pranonte të thirrej si dëshmitar edhe Fatmir Xhafaj, ministër i Brendshëm në momentin që shpërtheu skandali për dyshimet mbi përfshirjen e të vëllait në trafik narkotikësh.
Lista e dëshmitarëve, të kërkuar nga mbrojtja e të pandehurve dhe të refuzuar nga Artan Gjermeni vijon me sekretarin e Përgjithshëm të Partisë Socialiste, Taulant Balla, me prokurorët Donika Prela, Gentian Osmani e Përparim Kulluri.
Gjithashtu, gjyqtari Gjermeni refuzoi të thërriste si dëshmitarë edhe Drejtorin e Përgjithshëm të Policisë, Ard Veliu, si edhe vartësit e tij Albert Nushi e Andon Marko, për të cilët u publikuan përgjime duke “përpunuar” dëshmitarin e rremë, Fredi Alizoti.
Por, nga ana tjetër, gjyqtari Artan Gjermeni pranoi si palë në proces avokatin e “viktimës”. Ardian Visha u prezantua në proces si mbrojtës i të dëmtuarit nga vepra penale e “kallëzimit të rremë”, Agron (Geron) Xhafaj.
Në fakt, është disi e paqartë se cila është “viktima” në këtë proces. Agron (Geron) Xhafaj është kallëzuesi. Por, prokuroria, në hetimin e saj, ka konkluduar se shtetasit Ervin Salianji, Jetmir Olldashi dhe Albert Veliu, me veprimet e tyre, “kanë synuar të prishin imazhin e ministrit të Brendshëm (të asaj kohe), Fatmir Xhafaj.
Pra, vijon të jetë e paqartë se cili është ‘viktima” në këtë proces-Geroni, i cili pretendon se ndaj tij është bërë kallëzim i rremë apo Fatmiri, për të cilin prokuroria deklaron se ka qenë objekt i dëmtimit të imazhit.
