Një gol mund të të ndryshojë jetën edhe atëherë kur mendon se ke prekur fundin. Janë të shumta rastet në futboll kur lojtarë të ndryshëm kanë bërë kapërcime të jashtëzakonshme pasi janë bërë protagonistë në ndeshje të caktuara.
Rasti i mesfushorit të Kombëtares, Ylber Ramadani, është i ngjashëm, por që në të njëjtën kohë, tremb jo pak klubin që thuajse i ka siguruar shërbimet e tij. Prej javësh po flitet për një akord të Ramadanit me Partizanin, mirëpo goli që mesfushori shënoi në ndeshjen Shqipëri-Moldavi mund ta ndryshojë tërësisht situatën. Tashmë jemi në periudhë merkatoje dhe ofertat në drejtim të 23-vjeçarit me shumë mundësi do të nxjerrin në plan të dytë “demat”.
“Panorama Sport” mëson se menjëherë pas ndeshjes së të martës në “Elbasan Arena” kanë nisur “sondazhet” për mesfushorin, i cili është edhe dy vite nën kontratë me klubin danez. Vejle zbriti nga Superliga daneze në sezonin e fundit dhe Ramadani kërkon një tjetër destinacion.
DEKLARATA – Ramadani pranoi pas ndeshjes me Moldavinë se ka pasur bisedime me drejtuesit e Partizanit, por me sa duket, transferimi nuk është krejtësisht në dorën e tij. Megjithatë, vetë kosovari theksoi se një rikthim te Partizani nuk do ta konsideronte hap mbrapa në karrierë. “Për këto gjëra flet menaxheri im. Di që Partizani ka biseduar me menaxherin tim dhe thjesht kanë qenë biseda. Nuk do ishte një hap mbrapa rikthimi im në Shqipëri, sepse Partizani luan në Ligën e Kampionëve.” – deklaroi Ramadani.
