Kryetari i Bashkisë së Kavajës Elvis Rroshi ka apeluar masën e sigurisë arrest shtëpie, duke kërkuar shpalljen e pavlefshëm të këtij vendimi dhe rikthimin në detyrë.
Gjykata e Apelit do të japë vendimin më 4 korrik, nëse do ta lërë të lirë Elvis Rroshin apo do ta lërë në arrest shtëpie. Rroshi u arrestua më 13 qershor për falsifikim ë dokumenteve për formularin e vetëdeklarimit të ligjit të Dekriminalizimit.
Dy ditë më vonë, ai doli para Gjykatës për masë sigurie dhe trupi gjykues vendosi ta linte në arrest shtëpie, edhe pse ka fshehur veprat penale në Itali dhe në Zvicër.
Megjithatë, ai këmbëngul se është i pafajshëm, pavarësisht se dokumenti i autoriteteve italiane vërteton dhe tregon qartë se ka qenë i dënuar në Itali për përdhunim në grup. Jo vetëm kaq, por Rroshi kërkon madje që të kthehet edhe në detyrë si kryebashkiak i Kavajës, pavarësisht se ndaj tij ka vendime gjyqësore të disa viteve më parë nga Gjykatat e huaja.
