Rreth 50 shqiptarë janë riatdhesuar nga Franca.
Grupi i shqiptarëve, që ka udhëtuar me një avion të posaçëm nga Metz, ka zbritur në aeroportin Nënë Tereza në Tiranë, ndërsa operacioni për riatdhesimin e tyre është koordinuar mes policive të dy vendeve, asaj franceze dhe shqiptare.
Mes të riatdhesuarve kishte shumë të mitur, që bashkë me familjet e tyre kishin kërkuar azil në Francë, por u është refuzuar kërkesa për qëndrim.
Zv/ministria e Brendshme Rovena Voda ka theksuar se çdo përpjekje për kërkim azili është e kotë, sepse Shqipëria është në listën e vendeve të sigurta, ndaj ajo ka bërë thirrje për të mos ndërmarrë asnjë hap në këtë drejtim, por të kërkojnë rrugë ligjore për t’u punësuar në vendet e BE-së.
Drejtori i Departamentit për Kufirin dhe Migracionin në Policinë e Shtetit Eduart Merkaj ka theksuar se gjatë këtij 5 – mujori, fluturimet e riatdhesimit janë rritur jo vetëm me Francën, por edhe me shumë vende të tjera të BE-së, duke forcuar më tej bashkëpunimin, në drejtim të shkëmbimit të informacionit më të detajuar dhe në kohë reale.
Gjithashtu Polica Kufitare ka forcuar masat për parandalimin e kalimit të kufirit, me qëllim kërkimin e azilit në vendet e BE-së.
