Presidenti Ilir Meta, pas çdekretimit të datës 30 qershor si ditën kur do mbaheshin zgjedhjet vendore, nis sot konsultimet me partitë politike.
Në takimin e orës 19:00 në Presidencë pritet të jenë Nard Ndoka, Dashamir Shehi, Vangjel Dule, Fatmir Mediu dhe Agron Duka, ndërsa ditën e nesërme do të jenë LSI dhe PDIU.
Takimet synojnë vendosjen e një date të re për zgjedhjet, por nuk përjashtohet mundësia që për vetë situatën aktuale politike, zgjedhjet lokale dhe ato të parakohshme parlamentare të mbahen në të njëjtën ditë.
Deri më tani Partia Socialiste përjashton çdo mundësi për zgjedhje të parakohshme parlamentare, ndonëse Kuvendi nuk ka 140 deputetë, numri që përcaktohet në Kushtetutë, çka përbën në çdo kohë një mundësi për shpërndarjen e tij nga Presidenti.
Por çfarë pritet të përcaktohet në takimin e sotëm mes Presidentit dhe drejtuesve të partive të vogla?
Mësohet se ata nuk pritet të propozojnë një datë për mbajtjen e zgjedhjeve, pasi qëndrimi është i qartë, largimi i Edi Ramës nga posti i kryeministrit dhe nisja e negociatave për një qeveri tranzitore.
Por kushti kryesor që do të ulë palët në një dialog është vetëm largimi i Ramës nga posti kryeministror.
Në anën tjetër socialistët vijojnë të deklarojnë se zgjedhjet do të mbahen më 30 qershor, edhe pse dekreti ka hyrë në fuqi dhe është botuar në Fletoren Zyrtare.
Parlamenti pritet të nesër të zhvillojë një mocion me debat lidhur me dekretin e Presidentit që anulloi zgjedhjet e 30 qershorit. Dekreti i Kreut të Shtetit nuk është njohur nga 4 anëtarët socialistë të KQZ-së, që vijojnë punën sikur zgjedhjet do të mbahen në 30 qershor.
