Objektivi i Partisë Demokratike, opozitës së bashkuar dhe qytetarëve, është largimi i Edi Ramës nga posti i kryeministrit, si e vetmja mënyrë për të garantuar zgjedhje të lira dhe të ndershme.
Kështu mësohet të jetë shprehur kreu demokrat, Lulzim Basha, në mbledhjen e Këshillit Kombëtar të PD-së, forumi më i lartë vendimmarrës i partisë më të madhe të opozitës, ku pritet të përcaktohet strategjia e re, pas dekretit të Presidentit Ilir Meta për anullimin e zgjedhjeve më 30 qershor.
“Ia dolëm që të ndalojmë procesin fals dhe kriminal të 30 qershorit. Tashmë është e qartë që nuk do ketë zgjedhje lokale pa opozitën.
Ne duhet të jemi gati të bëjmë detyrën tonë për të mbrojtur demokracinë dhe rendin kushtetues dhe për të mos pranuar asnjë proces votimi fals, në shkelje dhe dhunim të Kushtetutës”, tha Basha.
Në vijim, ai shtoi se gjithë aksioni i derisotëm opozitar u finalizua me frenimin e një procesi njëpartiak dhe criminal.
Në këtë kuadër ai shprehu një falenderim për shqiptarët që mbështetën opozitën dhe treguan një qëndresë si asnjëherë më parë, në mbrojtje të demokracisë.
