Mediat greke kanë zbardhur detaje mbi takimin e zhvilluar dje mes kryeministrit Edi Rama dhe diplomatëve të vendeve të BE dhe SHBA të akredituar në Tiranë.
Në raportimet e mediave greke mbi zhvillimet në Shqipëri, mediat greke shkruajnë se për 90 minuta Rama pati takim me diplomatët, ku i ka dhënë versionin e tij lidhur me arsyet sepse zgjedhjet duhet të mbahen më 30 qershor.
Madje, raportohet se këndvështrimi i kryeministrit ishte vetëm në aspektin ligjor dhe jo në atë politik.
Njëri prej diplomatëve, i pranishëm në takim, i ka pohuar agjensisë së lajmeve ANA, se ambasadorët janë larguar nga takime me shumë pyetje.
Raportohet se kryeministri u ka kërkuar ambasadorëve të mos mbështesin kërkesat e opozitës, sikundër ka kërkuar ndikimin e tyre për të ulur tensionet.
Presidenti Ilir Meta një ditë më parë vendosi anullimin e zgjedhjeve më 30 qershor, dekret ky që nuk është pranuar nga mazhoranca dhe është kundërshtuar nga anëtarët socialistë në KQZ.
Ditën e enjte Kuvendi pritet të zhvillojë një seancë me 5 orë debat lidhur me qëndrimin e mbajtur nga Presidenti për anullimin e zgjedhjeve, ndërsa sot Kreu i Shtetit ka sqaruar edhe njëherë arsyet që e shtynë për anullimin e zgjedhjeve më 30 qershor.
