Shkarkimin e Presidentit Ilir Meta nga parlamenti nuk e lejon Kushtetua, shprehet avokati Ledio Braho.
Pra nëse të enjten, Rama siguron 94 vota pro shkarkimit të Metës, votimi është nul.
Në një intervistë për “Shijak Tv”, avokati Braho ka sqaruar edhe argumentet ligjore:
“Iniciativa për shkarkimin e Presidentit për shkelje kushtetuese apo në rastin e kryerjes së një vepre penale merret nga një e pesta e deputetëve dhe duhet të miratohet nga 2/3 e deputetëve që janë 94 mandate. Mazhoranca aktualisht nuk i ka 94 deputetët, por edhe po të marrim rastin që opozita e re mund të mbështesë mazhorancës, në këtë iniciativë sërish do të duhet një vendimmarrje e Gjykatës Kushtetuese, sepse është Gjykata Kushtetuese ajo që vendos nëse ka elementë të fajit në shkelje të Kushtetutës apo kryerjen e një vepre penale të Presidentit. Pra nuk është vendimi i Kuvendit ai që e shkarkon Presidentin, por i Gjykatës Kushtetuese edhe për sa kohë nuk ka një Gjykatë Kushtetuese Presidenti do mbetet në detyrë. Të gjithë hipotezat e tjera që qarkullojnë se është Presidenti ai që ankimon në Gjykatën Kushtetuese vendimin e Kuvendit, është antikushtetuese”, sqaroi ai.
Mund të shkarkohet Presidenti me rezolutë?
Edhe këtë mundësi, avokati Ledoi Braho e përjashtoi, duke e shprehur se kjo nuk parashikohet në Kushtetutë.
“Kryeministri nëse ka pasur një vullnet të tillë me rezoluta mund ta kishte përdorur edhe në rastin e Ministrit të Jashtëm, por fakti që nuk e ka përdorur konfirmon që Presidenti ka disa kompetenca siç ishte ai i mos dekretimit të ministrit të Jashtëm. Pra edhe në rast me shfuqizimin e dekretit të zgjedhjeve Presidenti ka ushtruar kompetencat e tij”. /Boldnews/
