Protestat e opozitës dhe vendimi i Presidentit Ilir Meta për të rrëzuar 30 qershorin si datën kur mund të bëhen zgjedhjet lokale kanë bërë jehonë në mediat ndërkombëtare.
BBC në një artikull për Shqipërinë shkruan se Presidenti shqiptar Ilir Meta ka anulluar zgjedhjet lokale pas muajsh protesta anti-qeveritare.
“Z. Meta tha se situata politike në Shqipëri nuk do të lejonte zgjedhje të rregullta, të planifikuara për në 30 qershor.
Njoftimi erdhi pak para se protestuesit, disa prej të cilëve hodhën tymuese dhe fishekzjarre jashtë parlamentit në Tiranë, që u shpërndanë nga policia duke qëlluar gaz lotsjellës.
Protestuesit po kërkojnë që kryeministri socialist Edi Rama të largohet.
Grupet e opozitës e akuzojnë atë për manipulim zgjedhor dhe korrupsion dhe kanë bërë thirrje për zgjedhje të parakohshme.
Ata gjithashtu duan të shohin krijimin e një qeverie kalimtare dhe kanë refuzuar të negociojnë me kryeministrin.
Lulzim Basha, kreu i Partisë Demokratike të opozitës, u ka bërë thirrje qytetarëve të vazhdojnë protestat derisa z. Rama të largohet.
Ai u tha mijëra mbështetësve në Tiranë se vendimi i presidentit për të anulluar zgjedhjet ishte “rezultati i parë i betejës sonë kundër Edi Ramës”.
Megjithatë, zoti Rama, i cili e ka udhëhequr vendin që nga viti 2013, tha më vonë se zgjedhjet lokale nuk do të anulloheshin.
Bashkësia ndërkombëtare ka bërë thirrje që partitë politike të Shqipërisë të përmbahen nga dhuna dhe të nisin një dialog.
Shumë figura, përfshirë Presidentin Meta, kanë thënë se ndarja politike e vazhdueshme kërcënon aspiratën e Shqipërisë për t’u bashkuar me BE.
BE ka kritikuar disa nga taktikat e dhunshme që përdorin protestuesit
Në një deklaratë të shtunën, Presidenti Meta u bëri thirrje udhëheqësve të opozitës për të zhvilluar protesta “në një mënyrë krejtësisht paqësore”.
Shtetet anëtare të BE do të votojnë në javët e ardhshme nëse do të hapin ose jo bisedimet e pranimit me Shqipërinë”, shkruan BBC.
