Nga Boldnews.al
Edi Rama nga dita në ditë përforëcon deklaratën se ata që do të tentojnë të prishin zgjedhjet e 30 qershorit përveç se do të përballen me ligjin, nuk do të lejohen të shkojnë në vendet e BE dhe SHBA. Madje për këtë të fundit ka deklaruar se jo vetëm ata, por edhe familjarët e tyre.
Për herë të parë Rama nisi të artikulojë këtë kërcënim rreth dy javë më parë dhe u mundua t’a shesë si një paralajmërim që i bëhej shqiptarëve jo prej tij, por nga kancelaritë ndërkombëtare.
Por më në fund ai ka zbardhur skenarin dhe ka zgjedhur Skraparin që t’a thotë prerazi: ata që do të prishin zgjedhjet do të trajtohen si kriminelët, që nuk lejohet të shkojnë në vendet e BE dhe SHBA.
Me pak fjalë sot Rama paralajmëroi hartimin e listave të zeza, ku çuditërisht do të përfshihen ata që sipas hartuesit do t’i cënojnë zgjedhjet.
Në lista nuk pritet të përfshihen ata që ndodhen sot në CD e regjistruara apo përgjuara me urdhër të prokurorisë, pasi në konceptin e liderit global, ata nuk kanë cënuar zgjedhjet, përkundrazi kanë rritur standardet zgjedhore.
Në 2001, kur Partia Socialiste ishte në pushtet, dhe Edi Rama pjesë e fushatës së saj, si kryebashkiak i Tiranës, manipulimi zgjedhor nuk bëhej në mënyrë kaq fine, sikundër ka ndodhur le të themi në 2017.
Në 2001 kutitë u mbushën në furgonat e policisë, e cila pasi kishte terrorozuar qendër më qendër votimi, ndryshoi edhe kutitë duke garantuar numrin magjik të 84 votave që i duheshin në atë kohë PS për të zgjedhur edhe Presidentin.
Në 2017 skema ishte ndryshe. Drejtuesit politik, me apo pa bashki në kurriz, kishin krijuar lidhjet me grupet që përgjoheshin për trafiqe, dhe që çuditërisht ishin edhe socialist të zjarrtë, sa ishin gati të sakrifikonin çdo gjë, vetëm që Rilindja e Ramës të fitonte.
Përgjimet duket se kapën, ndoshta pa dashje, një skemë që u përdor dhe që sot po zbërthehet, jo nga prokuroria, por nga mediat, apo sikundër Rama i quan “kazani”.
BILD publikoi 6 përgjime që ndoshta zbardhin majën e ajsbergut, ndërsa mbrojtja që po i bëhet zyrtarëve të kapur në biseda, është pothuajse e njëjtë me atë, që iu bë ish-ministrit të Brendshëm, Sajmir Tahiri.
Rama ka preferuar që 3 javë para 30 qershorit të shtojë kërcënimet, të marrë rolin e hartuesit të listave të zeza, ku do përfshihen sipas tij, ata që do të cënojnë votimet. Sikundër tha, emrat e tyre do të jenë në listat e policisë, që nuk do t’i lejojë të kalojnë kufirin.
Dhe kjo do të ndodhë pikërisht, kur nga Europa mund të merret një vendim, që t’i mbyllë kufijtë shqiptarëve për të lëvizur pa viza, pikërisht për shkak se Rama nuk ndëshkon dot ata që i sigurojnë votat dhe fitoren.
