Skënderbeu duket se është ende i paqartë në lidhje me të ardhmen. Veç pritjes nga KAS, korçarët duket se janë tashmë në dilemë për të mbajtur në linja të shëndetshme ekipin bardhekuq. I fundit në radhë është dilema ndoshta më e rëndësishme ajo e Orges Shehit. Trajneri i Skënderbeut ka dhënë mesazhin e parë të qartë drejt klubit se nuk preferon të jetë një zgjedhje e dytë.
Nga ana tjetër, presidenti Ardjan Takaj është munduar të kontaktohet nga “Panorama Sport”, por ka qenë e pamundur të lidhej me të. Gjithsesi, ajo që është ende e paqartë mbetet fakti se si do të vijojë puna në kampin bardhekuq sezonin e ri. Përgatitjet pritet të nisin më herët, por duket se gjithçka do të varet nga KAS dhe vendimi përfundimtar që do të dalë nga Gjykata e Arbitrazhit Sportiv në Lozanë.
SKENARI
Por, për të mos u gjendur në një situatë të papritur dhe për të qenë të përgatitur, bardhekuqtë e Skënderbeut duket se kanë filluar të krijojnë kontaktet e para me lojtarë të ndryshëm. Pas emrave të përmendur më herët, në pistë ka dalë edhe Enis Gavazaj. Ish-mesfushori i Skënderbeut duket se është gati të rikthehet sërish në Korçë nëse Skënderbeu fiton të drejtën e pjesëmarrjes në Europë.
