Kryeministri Edi Rama ka vijuar takimet në kuadër të fushatës për zgjedhjet e 30 qershorit, pavarësisht se opozita nuk është regjistruar në këtë proces, dhe përballë kandidatëve të Rilindjes nuk ka alternativa.
Në fjalën e tij, ndër të tjera Rama tha se ia dinte për nder Ilir Metës që e kishte sjellë për të parë turizmin në Skrapar.
“Ia di për nder Ilir Metës që më solli dhe më tregoi kanionet e Skraparit, pasi nuk i kisha njohur më parë.
Rruga Skrapar-Përmet do të përfundojë brenda këtij mandati të kryebashkiakut të ri, duke e lidhur këtë zonë me atë të Gjirokastrës, Përmetit dhe Tepelenës, ku po bëjmë investime të mëdha, duke zhvilluar turizmin, ekonominë familjare dhe atë kombëtare.
Më 30 qershor ju ftoj të shkoni në kutitë e votimit, sepse duhet një mbështetje jo vetëm për kandidatët tanë, por për Shqipërinë, që duhet të ndahet njëherë e mirë nga politika e baltës.
Duhet të shpërbëhen një grusht kokrrash tespijesh që janë mbledhur në fytin e këtij vendi dhe që ne duhet t’i shkulim më 30 qershor”, tha Rama.
Kryeministri tha se më 30 qershor ne nuk i kemi krijuar asnjë pengesë opozitës të hyjë në zgjedhje, por ata kanë vendosur që të kapitullojnë pa luftë, dhe kanë vendosur që luftën politike t’a zbresin në rrugë.
“Më 30 qershor t’i japim fund lojës shumë të rrezikshme të nisur, sepse vendit i duhet qeveria dhe Parlamenti për integrimin në BE, për punësimin dhe ekonominë.
Për këto arsye çdo shqiptar, pavarësisht se për kë ka votuar, t’a mendojë si shqiptar, se sa e rëndë është kjo që poi bëjnë Shqipërisë, se sa e tmerrshme është rruga e baltës së tyre për t’a nxirë Shqipërinë në sytë e familjes europiane”, tha Rama.
