Kryebashkiaku Vangjush Dako është shprehur edhe njëherë tjetër se personi em të cilin flet në telefonatën e përgjuar nuk është Astrit Avdyli.
I ftuar në emisionin “Repolitix”, me gazetarin Denis Minga, Dako ka sqaruar se personi me të cilin flet është një familjar i Avdyljave.
“Unë e kam thënë që nuk është Astrit Avdyli, është një person nga familja e tyre i cili komunikon me mua, por jo Astriti. Nuk është zëri i Astrit Avdyli. Nuk mbaj mend të kem folur ndonjëherë në telefon me të,”– tha Dako.
“A është Niçja (vëllai i Astrit Avdylit, Altini) personi me të cilin flisni ju në telefon,”– e pyeti gazetari Minga.
“Nuk do ta jap ty përgjigjen se cili është, por Astriti nuk është,”- theksoi edhe një herë tjetër Vangjush Dako.
Kryebashkiaku i Durrësit ishte i ftuar edhe mbrëmë në emisionin “Opinion” në lidhje me përgjimet e publikuara nga Bild, ku tha të njëjtën gjë në lidhje me telefonatën e përgjuar.
Dy ditë më parë prestigjiozia gjermane “Bild” ka publikuar audiopërgjime të reja lidhur me të ashtuquajturën “Dosja 339/1″një nga çështjet, hetimi i të cilës bëri që PD ta ketë si çështje kryesore në betejën për rrëzimin e qeverisë.Në përgjime dëgjohet Astrit Abdylaj, i cili përfshihet vetë në fushatën elektorale të PS.
Avdyli kërkon që miku i tij, Elton Arbana të jetë pjesë e listës së deputetëve në Durrës, dhe vë në dukje mbështetjen që familja Avdyli ka për deputetin Ilir Ndraxhi. Në bisedat e publikuara Astrit Avdyli zotohet se rezultati i Partisë Socialiste në Durrës do të jetë spektakolar.
