Skënderbeu është në fazën e pritjes së përgjigjes së KAS-it dhe gjithçka është lënë në pritje për ekipin. Për trajnerin e Skënderbeut, Orges Shehi, sezoni ka qenë pozitiv, ndërsa tani gjithçka pritet që të rindërtohet pas vendimit të KAS-it.
Ama, në një intervistë të dhënë për “Panorama Sport”, trajneri i Skënderbeut ka theksuar se nëse nuk është pjesë e planeve, jeta vazhdon, por ai ka një identitet.
Shehi, një sezon i mbyllur që u nis mirë vijoi keq dhe përfundoi me arritjen e objektivit. Për çfarë ju vjen keq?
Të them të drejtën, ka qenë një sezon që ne e kemi nisur me mjaft probleme, pasi jemi grumbulluar në korrik mes shumë dilemave.
Pasi filluam sezonin kemi treguar dëshirë dhe kemi marrë mjaft rezultate pozitive. Nuk kemi mundur të ruajmë ritmin dhe kemi gabuar mjaft në vijimësi, por e kemi mbyllur me arritjen e objektivit sezonal. Nuk ka qenë aspak e lehtë, pasi Skënderbeu u riformua i gjithi, duke pasur shumë ndryshime. E megjithatë, ia dolëm. Për këtë duhet të falënderojmë të gjithë lojtarët.
Flitet se Skënderbeu ka dy skenarë për të ardhmen, ku Daja mund të ulet në stol nëse fitohet KAS-i. A jeni në dijeni të kësaj?
E thashë pak më parë, nuk kam folur për asgjë me presidentin. Unë jam Orges Shehi dhe kam një identitet. Jam Shehi, jo plani B, as plani C, apo D.