Me një guxim për tu pasur zili, në rolin e një kryetari partie që përgjimet e prokurorisë e kanë nxjerrë si të kapur nga krimi për të fituar sa më shumë vota, Edi Rama, këtë të enjte, bëri moral për zgjedhjet.
“Për çdo krim zgjedhor që nga më i vogli deri më i madhi për këdo që guxon ti dali para një qytetari kujtdo që do të votojë, ligji është shembullor, por përveçse ligji të çon prapa hekurinave ata s’kanë për të dalë më nga Shqipëria se s’ka për ti lënë kush të futen në kufijtë e Bashkimit Europian”, ishte mesazhi i Ramës për ata të cilët sipas tij, kanë qëllim të pengojnë zgjedhjet.
Foli nga Cërriku, në aktivitetin për fushatën elektorale dhe gjithçka do të dukej mëse normale, nëse situata në të cilën ndodhet vendi do të ishte e tillë.
Deklarata vjen në kushtet kur “de facto” mazhoranca garon e vetme në zgjedhjet lokale, me opozitën tashmë jashtë kësaj gare, e që kërkon largimin e Ramës nga posti i kryeministrit si kusht për zgjedhje të lira e të ndershme. Pasi, siç shprehet kundërshtari i Ramës, “s’mund të ketë zgjedhje të lira e të ndershme me përdhunuesin serial të tyre”.
Deklarata vjen gjithashtu një ditë pas përgjimeve të dosjes 339 të publikuara nga BILD, e që treguan se zyrtarët më të lartë të PS-së në Qarkun Durrës merrnin urdhra e bashkëpunonin me Astrit Avdylajn, të dënuar për vrasje dhe aktualisht nën arrest me burg për trafik droge. Qëllimi, siç treguan qartë përgjimet, ishte për të ndikuar në rezultatin e zgjedhjeve të fundit parlamentarë në favor të Partisë Socialiste të drejtuar nga Edi Rama.
Dhe në këtë rast, fjala më e përshtatshme që mund të gjesh në fjalor për sjelljen e Ramës, është hipokrizi. /Boldnews.al/
