Nga Boldnews.al
Ylli Pjetërnikaj, drejtues i komanduar i Prokurorisë së Shkodrës, i vendosur në atë detyrë në kundërshtim me ligjin dhe pa plotësuar kriteret e nevojshme, ka lejuar një spirale nepotizmi, që vijon deri tek gjykata e qytetit verior.
Ajola Ymeri (Prenci) është një prokurore e komanduar në vartësi të Ylli Pjetërnikaj. Dikur ish-prokurore në këtë qytet, ajo u emërua në Prokurorinë e Matit, pas një skandali që përfshiu bashkëshortin e saj Pëllumb Prençi, ish-prokuror, i cili u arrestua dhe u dënua në vitin 2015 për “korrupsion”.
Pas disa vitesh në Mat, Ajola Prenci rikthehet në Prokurorinë e Shkodrës me firmë të Arta Markut, kësaj radhe si e komanduar.
Ndërkohë, në gjykatën e Shkodrës, në seksionin penal, është gjyqtar vëllai i prokurores, Andri Ymeri, i cili është i emëruar dhe ushtron prej vitesh funksionin e tij në qytetin verior.
Ligji për “Statusin e gjyqtarëve dhe prokurorëve”, i miratuar në vitin 2016 si pjesë e paketës së “Reformës në Drejtësi”, në nenin 8 të tij, parashikon ndër të tjera se: “Magjistrati nuk ushtron funksionin në një gjykatë ose prokurori, nëse një magjistrat tjetër, me të cilin ka lidhje të ngushta familjare, ushtron funksionin respektivisht në të njëjtën gjykatë ose prokurori”.
Ky nen përfshin pikërisht situatën ndërmjet magjistratëve motër e vëlla, prokurores Ajola Ymeri (Prenci) dhe gjyqtarit Andri Ymeri.
Ata kanë lidhje të ngushta familjare dhe ushtrojnë funksionet e tyre nën të njëjtin juridiksion (në Shkodër) dhe në të njëjtën fushë (penale).
Kjo situatë duhet të zgjidhej nga vetë magjistratët. Prokurorja Ajola Prenci, duke qenë e komanduar, duhet të kërkonte vetë transferimin në Prokurorinë ku është e emëruar, në zbatim të nenit të sipërcituar.
Por, në mungesë të reagimit të magjistratëve motër-vëlla, reagimi duhet të vepronin titullarët e institucioneve. E, pikërisht, në këtë pikë, përgjegjësia direkte bie mbi drejtuesin e Prokurorisë së Shkodrës, Ylli Pjetërnikaj.
Ai, në cilësinë e drejtuesit të Prokurorisë, duhet të vinte në dijeni dhe të kërkonte nga Këshilli i Lartë i Prokurorisë që të ndërpriste komandimin e prokurores Ajola Prenci.
Por, deri më tani, Pjetërnikaj, në cilësinë e drejtuesit të Prokurorisë së Shkodrës, nuk ka dorëzuar asnjë kërkesë zyrtare për të zgjidhur këtë situatë nepotizmi dhe anti-ligjore.
Nga ana tjetër, as Këshilli i Lartë i Prokurorisë (KLP) ka qëndruar tërësisht pasiv për t’i dhënë drejtim kësaj situate.
Pavarësisht se KLP nuk është vënë në dijeni zyrtarisht nga kryeprokurori i Shkodrës për nepotizmin ndërmjet Ajola Prenci (Ymerit) dhe Andri Ymerit, të paktën dy anëtarë të asaj strukture janë në dijeni të këtij rasti paligjshmërie.
Pjesë e trupës së Këshillit të Lartë të Prokurorisë janë dy anëtarë, të cilët kanë njohuri deri në detaje për stafin dhe organizimin e Prokurorisë së Shkodrës.
Anëtari Besnik Cani ka qenë për të paktën dy vjet drejtues i Prokurorisë së qytetit verior dhe ka dijeni të plotë për raportet familje ndërmjet magjistratëve Ymeri. Po ashtu, edhe anëtari tjetër i KLP-së, Vatë Staka, gjithashtu është në dijeni të lidhjeve familjare ndërmjet prokurores Ajola Ymeri dhe gjyqtarit Andri Ymeri.
Staka ka ushtruar detyrën e prokurorit prej shumë vitesh në Prokurorinë e Shkodrës. Madje, edhe kur u zgjodh si anëtar i KLP-së, në Prill 2019, ai u shkëput nga zyra e tij në institucionin e qytetit verior.
Pra, pavarësisht se strukturat përgjegjëse, përfshirë drejtuesin e Shkodrës, Ylli Pjetërnikaj dhe anëtarët e KLP, Cani e Staka, janë në dijeni të paligjshmërisë, askush nuk reagon për të zbatuar ligjin.
