Dy video të tjera janë publikuar nga përplasja e biznesmenit Altin Bamllari me policinë që hedhin dritë mbi deklaratat e të dyja palëve. Një video e re e publikuar tregon nga afër sherrin mes biznesmenit Altin Bamllari dhe punonjësve të Policisë Rrugore.
Forcat e Policisë ndaluan djalin e pronarit të piceri “Era” për shkak se automjeti kishte një gjobë prej 15 mijë lekë të reja të pa paguar. Videoja amatore e filmuar pranë stacionit të urbanit te Piramida, tregon momentin kur Bamllari debaton me punonjësit e Policisë.
“Nuk ka bërë asgjë djali. Lëre more djalin. Nuk do të vijë se nuk ka bërë asgjë. Ca do ta fusni tani në orën 1 aty që nuk kemi ku të marrim njeri në telefon. Unë jam i mikut tuaj, i Toles (Mithat Tola, Drejtori i Përgjithshëm i Policisë Rrugore), juve t’u vije turp; i Saimirit (ministrit të Brendshëm, Saimir Tahiri), i Engjëllushit, e i dreqit e i shejtanit jam”, shprehet Bamllari.
Ndërsa njëri prej policëve dëgjohet teksa mundohet t’i shpjegojë gjobën e marrë 150 mijë lekë për mungesën e siguracionit.
Ndërkohë në videon e “Opinion” marrë nga Kullat përballë piramidës shfaqen dy persona, në të njëjtën orë shfaqen duke vrapuar në drejtim të piramidës.
Në ndjekje të tyre është një polic. Orari i videos përkon me orën e pretenduar nga biznesmeni, por edhe nga Policia.
Ndërkohë që policia ka ndaluar makinën e biznesmenit, të cilën e drejtonte djali i tij, në afërsi të ambasadës ruse. Nuk dihet nëse largimi ka ndodhur pas përplasjes me policinë apo para saj.
Biznesmeni i është drejtuar Prokurorisë, ndërsa policia ka bërë kallëzim me akuzë për kundërshtim të punonjësit të policisë.
