Një person ka gjetur vdekjen në një aksident tragjik që ndodhi mëngjesin e sotëm në autostradën Vlorë-Fier. Një furgon mallrash që drejtohej nga një 22-vjeçar ka dalë nga rruga dhe është përplasur me trafikndarësen, sipas raportimeve pasi i ishte shpuar goma.
Po kështu janë plagosur edhe 7 persona të tjerë që ndodheshin në furgon.
JOQ sjell pamjet nga aksidenti, ndërsa qytetari që ka dërguar fotot tregon se personi që ka humbur jetën ka përfunduar poshtë rrugës pasi përplasja e nxori nga xhami i furgonit.
Policia thotë se rreth orës 07:30, në autostradën Vlorë-Fier ka ndodhur një aksident rrugor me pasojë vdekjen e një personi.
Shërbimet e Policisë janë afruar në vendin e ngjarjes dhe kanë konstatuar se në afërsi të kripës, një automjet tip “Furgon” me targë AA050EK, me drejtues shtetasin M.H., 22 vjeç, banues në Fier, duke drejtuar mjetin në drejtim të Fierit, ka humbur kontrollin dhe është përplasur me traversën anësore, ku për pasojë e këtij aksidenti janë dëmtuar 7 shtetas, ndërsa 1 tjetër ka humbur jetën në vend.
Grupi hetimor ndodhet në vendngjarje dhe po punon për sqarimin e rrethanave dhe shkaqeve të aksidentit.
