Besimtarët myslimanë në gjithë botës festojnë sot Fiter Bajramin, që shënon fundin e muajit të agjërimit.
Mijëra besimtarë u mblodhën në xhaminë e madhe të Stambollit. E përuruar këtë vit, xhamia priti për herë të parë besimtarët që falën Bajramin. I pranishëm në falje ishte edhe Presidenti turk Rexhep Taip Erdogan dhe i gjithë kabineti qeveritar. Ky objekt kulti është më i madhi në Turqi me një kapacitet prej 63 mijë besimtarësh dhe ndërtimi i saj konsiderohet si shfaqje e fuqisë ekonomike dhe politike e partisë në pushtet për Drejtësi dhe Zhvillim.
Rreth 1 milionë besimtarë myslimanë morën pjesë edhe në faljen e zhvilluar në xhaminë e madhe të Mekës, ku pjesëmarrja në të është pjesë e pelegrinazheve më të rëndësishme të fesë Islame.
Festa e Fiter Bajramit shpallet mbi bazën e shfaqjes së hënës së re që shënon nisjen e vitit të ri sipas kalendarit islamik. Në këtë ditë, besimtarët shkëmbejnë ushqime dhe ëmbëlsira mes njëri-tjetrit, por edhe për të vuajturit.
