Një mundësi të pakënaqurve ose më saktë lojtarëve që kanë pasur pak minuta gjatë këtij sezoni, qoftë në kampionat apo Kupën e Shqipërisë. Trajneri Skënder Gega ka menduar të bëjë një rrotacion total në ndeshjen e fundit që të kuqtë do të luajnë sot në Gjirokastër kundër Luftëtarit.
Bluzinjtë janë kundërshtari më i padëshiruar i “demave” në sezonin e titullit, pasi janë mundur tri herë deri më tani (2 herë në Kupë dhe 1 herë në kampionat). Megjithatë, duke parë se rezultati i kësaj ndeshjeje ka vetëm vlera statistikore për të dyja skuadrat, klubi i kuq ka menduar të kursejë disi në mbylljen e këtij kampionati.
“Panorama Sport” mëson se lojtarët janë njoftuar se udhëtimi drejt Gjirokastrës do të bëhet sot brenda ditës, teksa nisja nga Tirana është programuar në orën 09:00, në një kohë që ndeshja zhvillohet në 16:00. Trajneri Gega nuk do të ketë të gatshëm plot 11 lojtarë, shumica e të cilëve titullarë të padiskutueshëm si kapiteni Alban Hoxha, Labinot Ibrahimi, Egzon Belica, Lorenc Trashi, Esat Mala, Jasir Asani, Bruno Telushi, Jurgen Bardhi, Ardit Hila, Renaldo Kalari dhe Rubin Hebaj.
Shumicës së tyre iu është dhënë leje për të pushuar, ndërsa prej dëmtimeve mungojnë Kalari dhe Hebaj. Nga ana tjetër, Hila është i pezulluar për shkak të plotësimit të kartonëve, ndërsa Mala është grumbulluar me Kombëtaren U-21. Sot në Gjirokastër do të mungojë edhe portieri i tretë, Livio Malaj, i cili është grumbulluar nga Kombëtarja U-19. Me Dashamir Xhikën titullar, Gega ka grumbulluar edhe portierin e të rinjve, Holger Xhameta. Nga ekipi i të rinjve janë thirrur edhe mbrojtësi Ilirjan Dushaj, si dhe mesfushorët me tipare sulmuese Alban Gjinaj dhe Nilsen Gjinaj. Këtyre të fundit mund t’u jepet sot mundësia për të debutuar me të kuqtë në kampionat. Ndërkohë, nga minuta e parë pritet të luajnë edhe lojtarë si Atanda, Rexhepi, Mensah, Duka dhe Çinari. Titullarë do të jenë edhe Kodra e Ferati.