Analisti dhe pedagogo i njohur, Mark Marku ishte i ftuari i mbrëmjes në emisionin “Natë me Xhaxhiun” në Fax News ku foli për aktualitetin politik në vend, procesin e integrimit, protestën e studentëve etj.
Marku tha se përmasat e protestave të opozitës janë të mëdha duke argumentuar se edhe në shtetet europiane është e vështirë të shikohen sheshet aq të mbushur.
Marku komentoi edhe procesin e integrimit të vendit ku tha se ekziston mundësia që anëtarësimi mund të kthehet në një fatkeqësi kombëtare pasi të gjithë do të duan të ikin dhe diçka të tillë sipas tij, e tregojnë edhe sondazhet.
“Nuk shikoj elemente europianizimi qoftë në politikë, qoftë në ekonomi, qoftë në kulturë. Procesi i hapjes së negociatave nuk është procesi i anëtarësimit të menjëhershëm sepse kjo mund të zgjas deri në 20 vjet”, tha ai.
Duke folur për zgjedhjet e 30 Qershorit, Marku tha se nuk besonte se do të ketë zgjedhje pa opozitën. “Është faji i kujt është por kur bëhet përllogaritja e fundit, përgjegjësia kryesore i mbetet atij që drejton qeverinë”, tha Marku.
Sa i përket aksionit opozitar, ai tha se tashmë opozita ka zbritur tek qytetarët dhe i është bashkuar atyre në kauzat që kanë.
“Korrupsioni në administratën e shtetit ndodh për shkak të politizimit të saj. Duhet ti shkojmë analizës të gjithë bashkë, mediat, univeristetet etj, për ti shkuar në bazë që të zgjidhet një situatë e tillë. Ndryshimi duhet të vijë në mënyrë të përshkallëzuar, se ja ndryshuam Kushtetutën. Ajo garanton autonominë universitare. Para 3 ditësh Eglantina Gjermeni bën një ligj sipas të cilit Akademia e Shkencave do të monitorojë punën e universiteteve dhe autonominë e kërkimit shkencor. Kjo do të thotë që ERTV është media më e shquar, se një ministër është gazetar më i mirë se gazetarët profesionistë. Kjo do të thotë që të funksionojë kushtetuta dhe ligji duhet të respektohen”.
Duke komentuar deklaratat e Ramës i cili ka thënë më herët se ata që protestojnë nuk janë votues të PS, Marku tha: “Rama thotë se unë nuk jam zgjedhur nga ju dhe nuk qeveris për ju, as Gedafi nuk mund ta thoshte një gjë të tillë. Në momentin që zgjidhet pushteti lokal varet nga kryetari i bashkisë, që do të thotë se nuk ka asnjë system që kontrollon punën e tij se si i menaxhon të ardhurat”.
Duke folur për ‘shuarjen’ e protestës së studentëve Marku tha: “Ata realizuan një protest masive, por filluan të shantazhohen dhe gjithashtu tek ta nisën komplekset. Ata u treguan shumë rezistentë sepse nuk e pranuan kurrë dialogun. Por kjo nuk mund të vazhdojë pafundësisht. Ose duhet ta detyrosh atë të ndryshojë qëndrim përmes rrugës ose duhet të dialogosh me të”.
