Kreu i PD-së, Lulzim Basha i ka kërkuar Prokurorisë të hetojë dhunën e policisë pas rasteve të fundit të bëra publike, një prej tyre pronari i picerive Era, Altin Bamllari i cili rrëfeu gjithë ngjarjen.
Në një deklaratë të fundit, Basha i quan efektivët, “xhahilë” duke theksuar se “kanë imunitet pasi kontrollojnë trafikun e drogës në emër të Saimir Tahirit”.
“Xhahilët e Saimir Tahirit kanë dhunuar barbarisht në 24 orët e fundit 3 qytetarë, që nuk kishin asnjë problem me ligjin. Në mes të Korçës, dy banditë me uniformë Buis Hysi dhe Alfred Nomani rrahin brutalisht një djalë të ri në punën e tij, e torturojnë me pas dhe në qeli, dhe për këtë maskarallëk kanë pëlqimin e drejtorit të Policisë në Korçë, Ajet Zyberi, subjekt i sigurt i ligjit për dekriminalizimin. Këta xhahilë me duart me gjak, vazhdojnë detyrën dhe kanë imunitet, sepse kontrollojnë trafikun e drogës, në emër të Saimir Tahirit. Në Tiranë, një biznesmen i njohur, dhunohet bashkë me të birin 20-vjeçar, për një gjobë të papaguar makine, edhe pse tregojnë vullnet për ta shlyer detyrimin e për të dorëzuar dhe makinën. Biznesmeni Bamllari ka denoncuar urdhëruesin e dhunës, Gerald Baka”, deklaron Basha.
Sipas tij, ‘shenjat e dhunës në fytyrën dhe trupin e këtyre 3 qytetarëve, janë shenjat e sundimit të bandës së Tahirit, që nderon, respekton dhe i lëpihet Shullazit, dhe thyen brinjët e atyre që shohin punën e vet dhe s’kanë asnjë problem me ligjin’.
“Xhahilët që kanë ngritur dorën ndaj qytetarëve, kanë emër, mbiemër dhe do ta paguajnë para ligjit këtë që kanë bërë. Më shumë përgjegjës është sot shefi i tyre Tahiri që s’ka marrë asnjë veprim ndaj tyre. Përgjegjës që do të mbajë përgjegjësi nesër”, thotë kreu i PD.
Basha i ka kërkuar prokurorisë të hetojë këto raste pasi në të kundërt populli duhet t’i bëjë llogaritë vetë.
“I kërkoj prokurorisë të reagojë menjëherë për këto raste, të hetojë me shpejtësi e të çojë në gjykatë autorët. Secili nga ne është i dhunuar, nëse një dhunë si kjo lejohet. Nëse nuk ka reagim nga prokuroria, ajo bëhet pjesë e rrahjes brutale, e pastaj popullit e qytetarëve nuk i ngelet tjetër vetëm t’i bëjë vetë llogaritë e të marrë vetë masat për të vënë drejtësi”, shprehet Basha.
