Merkatoja e verës pritet të jetë “e nxehtë” për Partizanin. Drejtuesit e kuq e shikojnë si marrëdhënie biznesi Partizanin, ndaj ata do të analizojnë çdo hyrje dhe dalje. Në planet e “demave” bën pjesë edhe shitja e lojtarëve për të mbushur arkën, por për momentin rëndësi ka ecuria në Kupat e Europës.
Vetë presidenti Demi ka pohuar se duhet ndjekur shembulli i Skënderbeut në Europë, ndaj synohet arritja në fazën e grupeve, pasi aty shikohet edhe përfitimi financiar.
Klubi është më i prirë të përforcojë grupin, por nëse u mbërrin një ofertë e kënaqshme, largimet bëhen të mirëpritura. Është thënë se nuk do të largohen më lojtarë për një “copë bukë” nga Partizani, por priten emra të spikatur në merkato.
